Vieiros

En moi escasas ocasións vimos (e veremos) unha representación tan completa da música galega sobre o mesmo escenario. Os días 18 e 19 de outubro, no Auditorio de Galicia de Santiago de Compostela, Fuxan os Ventos regresará cun espectáculo, Terra de Soños, no que reinterpretarán os temas máis coñecidos do grupo, acompañados en cada canción por algúns dos nomes máis importantes da música galega do momento.

Así, participarán Guadi Galego, Mercedes Peón, Xabier Díaz, Rodrigo Romaní, Pepe Ferreirós, Miguel Lustres, Sabela e Nova Galega de Danza. Contarán todos co acompañamento dunha banda dirixida por Xosé Lois Romero, que ademais tocará o acordeón. Tamén se ocuparán da música o cuarteto de corda Savia Nova, Simón García (contrabaixo), Roi Adrio (percusións), Guillermo Fernández (guitarra) e Benjamín Otero (oboe e clarinete).

O espectáculo está patrocinado pola entidade Xacobeo, a Concellaría de Cultura de Santiago de Compostela, a Televisión de Galicia, a Consellaría de Cultura e o Restaurante O'16. Colabora, asimesmo, Vieiros.