Vieiros

Este xoves comeza a sexta edición dos campionatos estatais impulsados pola organización Special Olympics como medio de integración das persoas con discapacidades intelectuais.

Antes de partir cara a Castelló (Valencia), onde se disputarán os Xogos deica o domingo, os nosos representantes -en total, 92 pertencentes a asociacións de Monforte, Compostela, Burela, Ourense, Vigo e A Coruña- reuníronse co director xeral de Acción Social, Bieito Seara, que lles entregou o material deportivo co que han participar.

En Castelló agárdase a chegada dun total de 1.500 deportistas, que competirán en 26 disciplinas diferentes. Os outros grandes protagonistas destes catro días son todas aquelas persoas que ofrecen a súa colaboración de forma desinteresada. Na cidade española estarán 370 adestradores e delegados, 500 voluntarios, 100 árbitros e xuíces e 50 técnicos e persoal da organización.

Programa completo
Entre as disciplinas están o atletismo, o baloncesto, a natación, o fútbol sala ou probas adaptadas en motricidade. Pero o programa ofrece actividades paralelas, como varias sesións de formación técnico-deportiva dedicada aos técnicos e voluntarios. Tamén se celebrará unha feira do ocio na que se habilitarán xogos e talleres durante os catro días de competición.

40 anos a traballar pola integración
Special Olympics é unha organización creada no ano 1968 coa intención de fomentar a práctica do deporte como un medio de integración para as persoas con discapacidades intelectuais. Nesta liña traballou durante catro décadas até chegar na actualidade a sumar máis de dous millóns de deportistas, repartidos polos máis de 170 estados nos que ten representación.