Vieiros

Para o Sindicato de Traballadoras e Traballadores do Ensino de Galiza (STEG) é só unha cuestión de vontade política: exixen á Consellaría de Educación que mude a súa postura con respecto aos colexios que segregan por razóns de sexo. Cunha manifestación perante as instalacións da Xunta, berraron contra as achegas económicas do departamento de Laura Sánchez Piñón aos centros do Opus e contra unha política que consideran que "favorece un ensino ultraconservador".

Revisión inmediata
Xosé Cabido (STEG) recorda que unha sentenza do Tribunal Supremo lle deu a razón á Xunta de Castela-A Mancha, quen decidira negarlle a posibilidade de subvención a estes centros educativos. Con esta resolución na man, a Consellaría de Educación pode rexeitar o concerto coas escolas que segreguen ao alumnado por cuestión de sexo, xa que deixa ao criterio dos territorios a súa concesión ou non. Ademais, dende este sindicato consideran que Sánchez Piñón está a incumprir o Decreto de admisión de alumnado de marzo de 2007, que emana da propia Consellaría e que di que "en ningún caso haberá discriminación na admisión do alumnado por cuestión de sexo".

Con esta concentración, piden a revisión dos concertos educativos, unha fórmula que entenden que desvía fondos da escola pública para a privada, e que non se volvan conceder subvencións a colexios que separan a nenos e nenas. Ademais, despois da última intervención pública do Presidente da Xunta ao respecto, dende STEG considera incomprensíbel a continuidade desta fórmula e piden que se lle retire a achega económica a estes centros de forma inmediata e con independencia das medidas legais que estes puideran tomar.

"As forzas sindicais claudicaron"
Non obstante, non todos os sindicatos se manteñen unidos nestas reivindicacións. Segundo Cabido "outras forzas sindicais teñen outros intereses, se cadra por mor da afiliación que teñen na concertada". Con todo, a páxina web deste colectivo está a recibir cada día máis adhesións: "xa temos máis de 200 sinaturas de algunhas de organizacións tan relevantes no Estado Español como Intersindical Valenciana, que aglutina a un número de 30 mil persoas, ou o asturiano Suatea, que están connosco na reivindicación dun ensino sen discriminacións.