Vieiros

Vieiros de meu Perfil


GZ-Deportiva

Xestionado por Vieiros
RSS de GZ-Deportiva
Lembrando todos os deportes

Os xogos populares a tradicionais tamén teñen o seu plan estratéxico

Titúlase "A realidade dos xogos e deportes populares e tradicionais nos concellos galegos", e presentarase en Compostela o vindeiro domingo 8 de febreiro.

Redacción - 09:00 31/01/2009

A directora xeral para o Deporte, Marta Souto, presentou esta sexta feira a xornada "Plan Estratéxico dos Xogos e Deportes Populares e Tradicionais" que se desenvolverá o vindeiro domingo 8 de febreiro no Pazo de Congresos e Exposicións, en Compostela, e na que se mostrará o estudo "A realidade dos xogos e deportes populares e tradicionais nos concellos galegos".

Souto explicou que este informe ten como obxectivo "dar a coñecer a todo o país o noso deporte tradicional, así como dinamizar e posibilitar a súa transmisión a todas e todos os galegos", ao tempo que lles agradecía a todos os clubes galegos que se implicaron neste traballo. Nesta liña, Marta Souto lembrou o "éxito" que tivo a posta en marcha da Liga Nacional de Billarda, as ligas galegas de Chave e Traíñas ou o campionato de Bolos e outras modalidades.

Do estudo, que é pioneiro en Galiza, presentaranse os datos referidos á situación dos xogos e deportes populares e tradicionais en Galiza, que se converterán, segundo o coordinador do mesmo, unha "boa ferramenta para que os axentes políticos e sociais asuman a elaboración do Plan como algo propio, de cara a garantir a súa sustentabilidade e continuidade". "É importante lograr a implicación das persoas participantes na xornada e xerar unha rede de intercambio e coñecemento, procurando a participación e implicación social das diferentes entidades públicas e privadas de Galiza", incidiu a representante da cooperativa Cidadanía que realizou o deseño do Plan Estratéxico, Rosa Muñíz.

A xornada comezará as 10:15 coa presentación das liñas estratéxicas para o fomento dos xogos e os deportes populares e tradicionais (infraestruturas e actividades de promoción) e, posteriormente, realizarase a presentación dos resultados do estudo "A realidade dos xogos e deportes populares e tradicionais nos concellos galegos".


3.4/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Na imaxe, Marta Souto (no centro), acompañada de Rosa Muñíz e Constantino Arce
Na imaxe, Marta Souto (no centro), acompañada de Rosa Muñíz e Constantino Arce
A billarda, un dos deportes tradicionais estudados / Imaxe: Nachok
A billarda, un dos deportes tradicionais estudados / Imaxe: Nachok