Vieiros

Un ano despois do previsto, os socialistas galegos comezan un profundo cambio na súa estrutura interna. Seguindo os criterios marcados polo PSOE, e especialmente por Xosé Blanco, o PSdeG aposta por unha férrea organización provincial que, cun certo parecido ao PPdeG, busca mellorar a “maquinaria electoral”. O secretario xeral Manuel Vázquez anunciou este luns que entre o 15 de setembro e o 30 de novembro a afiliación vai participar na elección dos comités provinciais.

Despois do verán o PSdeG vai quedar dividido organicamente en catro provincias, cada unha destas dotarase dos seguintes órganos: Congreso Provincial, Comité Provincial, Comisión Executiva Provincial e Comisión Revisora de Contas. A isto haberá que sumar unha figura clave: a de secretario provincial, moito máis reforzada que no modelo actual.

Os poderes das novas direccións provinciais son notábeis. Este órgano será o que referende as candidaturas de cada concello ou o que propoña os candidatos pola circunscrición nas eleccións galegas e españolas. Os novos secretarios provinciais convértense en figuras con amplos poderes á hora de resolver conflitos a nivel local ou para decidir o nome dun aspirante a alcalde.

A nova estrutura interna aseméllase á do PPdeG. Os partidarios da “provincialización” consideran que a base do éxito dos conservadores é a súa forte implantación municipal, vixiada de perto por organismos de tipo provincial. Cada secretario provincial gaña poder fronte á rúa do Pino, pero a cambio ten a responsabilidade dos resultados electorais na súa circunscrición.

No seu momento, Emilio Pérez Touriño foi un dos detratores deste modelo. O ex secretario xeral consideraba que un maior poder dos secretarios provinciais podía dexenerar en “baronías” que lle restasen poder á dirección nacional e a el mesmo.

As eleccións locais, a gran esperanza

No PSdeG cren que só uns bos resultados nos comicios locais de 2011 poden dar azos para recuperar San Caetano. A actual dirección sabe que se o PPdeG logra gañar terreo nos consistorios vai ter na man unha segunda maioría absoluta dentro de catro anos.

O principal perigo concéntrase no mundo urbano e vilego, onde os conservadores están a reaxir. O PPdeG ten como obxectivo prioritario recuperar poder nas sete cidades do país, agora gobernadas por socialistas e nacionalistas.

O que dá primeiro...
Pero quen van ser os novos homes fortes do PSdeG? Aínda que a incógnita vaise despexar en cuestión de meses, hai quen xa moveu ficha. Un  exemplo é o do presidente da Deputación da Coruña, Salvador Fernández Moreda, que, tal e como desvelara este xornal, hai xa máis dun ano que aspira a ser o líder dos socialistas coruñeses.