Vieiros

O 'Monumento ao Camiñante Descoñecido' inaugurouse o 1 de xullo de 1934 en Barallobre, Fene, nun acto ao que acudiron Ramón Otero Pedrayo, Ramón Vilar Ponte ou o médico Rof Codina. A idea deste monumento xurdiu en abril de 1932 da man do cronista do xornal Pueblo Gallego Alfonso Piñón. Recorda o feito de que Barallobre sempre foi un lugar de paso de peregrinos (a Santiago polo Camiño Inglés e a Santo André de Teixido) e de viaxeiros (a Ferrol), pero dende o comezo homenaxeou aos autores galegos, inscribindo o nome de Rosalía, Curros, Pondal ou Castelao. E tamén o de Neira Vilas, dende hai uns anos. O monumento trasladouse da súa ubicación orixinal en maio de 1984 para permitir a supresión do paso a nivel, unha reinauguración presidida por Xosé María Pérez Parallé.

Este sábado o monumento celebrará o seu 75 aniversario, cunha homenaxe ao propio Neira Vilas, o único persoeiro vivo da cultura galega con banco de seu neste parque. As actividades comezarán ás once e media da mañá cun pasarrúas até o monumento, onde se realizará unha ofrenda floral. Despois, celebrarase un festival folclórico no que participarán a banda de gaitas Fontornela de Mera, a agrupación folclórica Donas e Galáns de Ferrol e o grupo de baile Bolboretas da Liga de Amigos de Barallobre. Xa pola tarde celebraranse distintas actividades de deporte rural e xogos tradicionais así como unha churrascada a partir das oito da tarde e como peche de festa un festival folclórico no que tomarán parte as cantareiras de Bolboretas, o grupo folk Estimaba que viñeras e a gaiteira Cristina Pato.