Vieiros

Vieiros de meu Perfil


Edición xeral

RSS de Edición xeral
POLÉMICO ACORDO

Os militares estadounidenses terán inmunidade en Colombia

O goberno colombiano deu a coñecer o acordo asinado con EUA, no que autoriza ás tropas estadounidenses a operar por dez anos en sete bases militares.

Redacción - 13:15 04/11/2009
Os militares estadounidenses terán autorización para ocupar as bases militares colombianas nos vindeiros dez anos

Os militares estadounidenses terán autorización para ocupar as bases militares colombianas nos vindeiros dez anos

"Os militares de Estados Unidos e as persoas a cargo que veñan a Colombia estarán amparados polo status de impunidade diplomática". Así reza o polémico "Acordo complementario para a Cooperación e Asistencia Técnica en Defensa e Seguridade" asinado entre Colombia e Estados Unidos. Os termos deste convenio, que no texto se basea na loita contra o terrorismo e o narcotráfico, deunos a coñecer este mércores o Ministerio de Relacións Exteriores colombiano.

Con todo, e logo da polémica xerada por este punto, o goberno daquel país insistiu en que esta inmunidade "poderá ser levantada polas autoridades pertinentes dos Estados Unidos en atención dunha solicitude das autoridades colombianas", e estipula que esa situación se podería dar para a investigación de "supostos crimes cometidos no territorio colombiano".

Os estadounidenses terán acceso e uso das bases militares das áreas de Palanquero (centro), Malabo (Caribe, norte), Apiay (este); os fortes do Exército Larandia (Sur) e Tolemaida (centro), e as bases navais de Cartagena (Caribe) e Baía Málaga (Pacífico, oeste), segundo detalla o texto. Mais, os efectivos militares terán tamén acceso e uso "das demais instalacións e situacións en que conveñan as partes". A maiores, o acordo tamén habilita ao persoal de Estados Unidos para levar armas.

Chávez: "Na Casa Blanca consumen a cocaína que sae de Colombia"
Segundo ambos gobernos, o obxectivo deste pacto é a loita contra o narcotráfico e o terrorismo. Porén, países como Venezuela, Ecuador, Bolivia, Nicaragua ou Uruguai xa amosaron o seu rexeitamento a presenza norteamericana en Colombia, dende onde temen que lancen operacións contra gobernos críticos coas políticas de Washigton.

En concreto, un dos máis críticos con este acordo foi Hugo Chávez. O presidente venezolano advertiu que "sopran ventos de guerra" e anunciou a suspensión de toda relación comercial con Bogotá. Ademais, explicou que o problema das drogas non está nos países produtores, senón na alta demanda por parte de Estados Unidos: "o nivel de adictos é tal que até na Casa Blanca se consume cocaína", dixo.

Así, acusou ás tropas estadounidenses de favorecer e canalizar o tráfico de estupefacientes: "Está demostrado que o 80% da droga en Colombia sae polo Pacífico e aí teñen os ianquis portavións; o que fan é propiciar o narcotráfico e coidalo", dixo.


2.33/5 (3 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: