Vieiros

A editorial Galaxia publicará como libro dixital todo o seu catálogo. É o resultado dun acordo anunciado pola compañía Publidisa, dedicada á produción e comercialización de ebooks en Internet. Froito do mesmo acordo, Galaxia será a primeira editorial galega en contar cunha libraría electrónica propia, co que aspira a converterse en “portal de referencia para o libro galego na rede”.

Os editores galegos están a tomar posicións para a explosión comercial do libro dixital, que se agarda que se produza moi pronto. Os fondos de Galaxia xa estaban parcialmente dispoñíbeis no catálogo de Google Books, e o novo acordo prodúcese pouco despois de que Xerais anunciase que lanzará as súas novidades simultaneamente en formato papel e dixital, comezando coas novelas de Suso de Toro e Diego Ameixeiras.

As editoriais analizarán esta semana o presente e futuro do libro electrónico no sexto simposio anual da Asociación Galega de Editores, que se celebra o xoves e venres no Consello da Cultura Galega, en Santiago de Compostela.