Vieiros

Nova Escola Galega, que agrupa a máis de 400 docentes de todo o país, vai xa camiño dos 27 anos. E este 2010 vén cargado de estreas para a asociación. A primeira foi este mesmo venres coa inauguración dun novo local no número 18 da rúa San Clemente (Compostela). Aproveitando este acto, tamén se presentou o libro Nova Escola Galega e a Lingua (1983-2008). 25 anos na defensa do idioma. Un traballo colectivo que, aínda que elaborado vai xa para 11 meses, non saíu á luz pública até o de agora.

Na publicación, que foi presentada por Xosé Lasta, Mariló Candedo e Xosé Manuel Malheiro, participan con diferentes artigos María Pilar Freitas, Anxo Lorenzo, Carme Hermida, Henrique Monteagudo, Agustín Fernández Paz, Bieito Silva, Goretti Sanmartín, Xosé Manuel Sarille, Nel Vidal, Valentín García e César Martínez Yáñez. Tamén achegan colaboracións entidades como o Consello da Cultura, a AS-PG, CIG, CC.OO, STEG.

Mais Nova Escola tamén aproveitou para presentar unha análise crítica das bases que presentou o Goberno para a derrogación do anterior decreto. O colectivo fai un estudo comparativo, punto por punto, do decreto de 1995 (goberno Fraga); do aínda vixente (elaborado polo bipartito); e da proposta do executivo de Feijoo. O ilustrativo informe pode descargarse da súa páxina web en formato PDF.

O propio Xosé Lastra sumouse ás numerosas voces que lle piden ao Goberno que retire o decreto e volva ao consenso. Dende Nova Escola lembraron que no seu momento foran críticos coa normativa do bipartito porque consideraban que era, aínda sendo un paso adiante, era insuficiente para frear o forte proceso desgaleguizador que vive a sociedade.