Vieiros

A Xunta amosou a súa disposición a que a mediados de abril "estea posto en marcha e funcionando" o novo Consorcio Audiovisual de Galicia, que asumirá todas as competencias audiovisuais, até agora espalladas entre varios organismos. O secretario xeral de Medios, Alfonso Cabaleiro, tamén anunciou que xa se lle enviou ao DOG a orde de axudas á produción cinematográfica, que se publicará nun par de semanas.

O anuncio fíxose durante a presentación dos Premios Mestre Mateo, que se entregarán o 15 de abril en Narón. Cabaleiro asegurou que o "reto" e que esa semana o Consorcio se converta no novo "órgano de encontro" do sector audiovisual.

Sobre as "primeiras medidas" que tomará, o secretario xeral mencionou a "expansión do sector" e fixo fincapé na necesidade de poñer o acento na mellora da comercialización e da promoción do audiovisual do país, na que terá un "intenso papel" a TVG, que deberá achegar o 5% do seu orzamento ao sector galego.

Así mesmo, Cabaleiro dixo que se "reactivarán" as liñas do Igape para financiar o audiovisual e que se publicarán "en dúas ou tres semanas" as axudas á produción deste ano, que até o momento foron convocadas pola Agadic.