Vieiros

Vieiros de meu Perfil


Galego.org

Xestionado por Vieiros
RSS de Galego.org
Cuestionada a política dos últimos anos

O goberno de Irlanda nega o permiso para unha nova Gaelscoil, escola de inmersión lingüística en gaélico

Organizacións a prol da normalización axudarán os pais da vila de Ráth Tó a montala pola súa conta, e critican a actitude da Administración.

Redacción - 19:15 06/05/2010

A rede de Gaelscoileanna (escolas de inmersión lingüística en gaélico) conta na actualidade con 169 centros de primaria e 38 de secundaria nos 32 condados de Irlanda. Podería ser unha máis, mais o departamento de Educación do país non concedeu o permiso para a súa apertura en Ráth Tó.

Porén, varias organizacións civís a prol da normalización do gaélico irlandés tomaron o relevo e decidiron axudar os pais da vila a facer realidade o proxecto pola súa conta, e xa teñen previsto abrila en setembro de 2010.

As entidades son An Foras Pátrúnachta, Glór na nGael, Comhluadar, Conradh na Gaeilge e a propia asociación Gaelscoileanna Teo, e o lema da campaña é Aitheantas, que significa "recoñecemento", recolle esta cuarta feira The Meath Chronicle.

Ningunha Gaelscoil desde 2008
"Malia o rexeitamento a recoñecer a Gaelscoil (nome en singular), aínda que é necesaria e hai demanda, decidimos estabelecela de xeito non oficial pola nosa conta co xeneroso apoio das organizacións pola lingua", declarou ao xornal unha voceira dos pais, que agardan poder ter finalmente o permiso de Educación.

Neste senso, uns e outros observan unha mudanza de criterio nos últimos anos por parte da Administración, que non ten en conta -din- a cuestión lingüística á hora de autorizar novos centros educativos. "O resultado é que nin unha Gaelscoil máis foi aprobada desde 2008 e Educación non dá indicios de que esta situación vaia a mudar", sinalou a portavoz.


2.6/5 (10 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: