Vieiros

Vieiros de meu Perfil


Máis Alá

Xestionado por Vieiros
RSS de Máis Alá
A Academia decide a finais deste mes

Fernández Morales abrolla outra vez na lista da RAG para a homenaxe das Letras

Os académicos correspondentes do Eo-Navia, As Portelas e Val das Ellas apoian a proposta remitida desde o Bierzo en favor deste autor.

Redacción - 11:00 17/06/2010
Homenaxe na tumba de Morales, realizada no 190 aniversario do seu nacemento

Homenaxe na tumba de Morales, realizada no 190 aniversario do seu nacemento

Hai agora case un ano que entre os favoritos na lista sobre a que decidía a Real Academia Galega (RAG) a homenaxe para o Día das Letras aparecía a terna conformada por Carvalho Calero, Fernández Morales e Uxío Novoneyra. O courelao foi finalmente o elixido e a quenda de selección volve deixar ao cabo deste mes de xuño aos outros dous como probábeis posibilidades.

Desta volta, o académico correspondente do Bierzo, Héctor Silveiro, vén de remitirlle á RAG a solicitude formal en favor de que Antonio Fernández Morales sexa o autor homenaxeado no Día das Letras en 2011. A proposta a prol do poeta berciano leva tamén o aval dos académicos Carlos Aenlle do Eo-Navia de Asturias, Felipe Lubián das Portelas de Zamora e Domingo Frades do Val do Ellas de Estremadura.

Fanse 150 anos da publicación dunha obra clave do Rexurdimento

En defensa da proposta, os académicos salientan a importancia da obra 'Ensayos poéticos en dialecto berciano' (1861) da que foi autor Antonio Fernández Morales, libro de gran importancia para a literatura galega por ser un dos primeiros publicados na etapa do denominado Rexurdimento, dous anos antes doutro gran libro co que tradicionalmente se di que Rosalía inaugura dita etapa. E xustamente en 2011 coincidirá o 150 aniversario da súa publicación.

"Cargado de peculiaridades léxicas, outro dos aportes do libro, o autor tentaba crear conciencia da necesidade de ''legar á posteridade'' unha lingua comprendida como unha expresión que debe verse nobre e digna, orixinal e intimamente ligada a unha terra", expoñen. Ao fío, remítense a unha recente edición da obra realizada polo Instituto de Estudos Bercianos, onde o profesor e escritor Anxo Angueira sinala que o libro de Morales "por riba da inigualable riqueza antropolóxica e lingüística, entregoulle un dos máis grandes monumentos á nosa Historia da Literatura e o mellor canto que coñezamos ás terras do Bierzo".

A prol desta suxestión á RAG, sublíñase tamén a importancia de asentar a defensa da lingua na comarca berciana, "facendo visíbel a propios e estraños que esta lingua é patrimonio natural do Bierzo, pois é o autor dos ensaios en dialecto berciano o homenaxeado e á vez patrimonio común que comparte Galiza con todos os territorios de fala galega". "Unha gran oportunidade de que avance o camiño da reconciliación coa identidade que está realizando o Bierzo despois de incorporar o galego ao ensino en colexios e institutos (máis de mil familias de xeito voluntario), despois de ser recoñecido polo seu Consello Comarcal ou lograr que apareza mesmo na lexislación da comunidade autónoma á que pertence", indican.


4.75/5 (16 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: