REPÚBLICA DA MULTITUDE
Galicia racista. Si, racista.
Os Rosales, Eirís, Novo Mesoiro, Monte Porreiro, Caritel… Son nomes que aboian encol da materia viscosa e graxumenta dos medios de comunicación. Os materiais máis vulgares e aborrecibles impugnan con violencia toda capacidade de convivencia, tecen unha bandeira que mellor aparentaría esvaecida ben lonxe entre as chuvias e unha néboa disolvente. E cando digo convivencia non digo asimilación nin integración.
Entre as persoas que organizan e protagonizan as reaccións contra a presenza de familias xitanas nos seus barrios e urbanizacións actúa como cemento a súa condición de propietarios, propietarios apenas dun paquete de ladrillos, e o seu desexo de ampliar as súas pertenzas exclusivas a todo o espazo circundante: ao chan, ao aire, ás construcións que están á vista. Á negación das vidas dos outros. Senten un sagrado terror a que as súas propiedades perdan valor no mercado. É todo o que nos ensina a escola do Capital día e noite. A propiedade, a cousificación do valor de uso, fachendea co seu dominio da distorsión paroxística de todo o que se relaciona co ser humano en sociedade.
Nesta horda violenta contra xitanos latexa tamén a pulsión fratricida do pobre, a súa ilusión de ollar máis abaixo e descubrir seres inferiores. O poder necesita que o excedente de frustración en forma de violencia se canalice contra aqueles a quen os irados encirrados consideran inferiores, nun exceso alucinado de imaxinación enferma. Nunca contra os amos. Ese é un fundamento sólido da submisión social. Non faltará quen interveña con opinión mediática para xustificar o racismo preventivo, a poder ser coa beizón da verdade segura que outorga a militancia católica, integrista, Opus Dei. Y canallas como cristianos, que deixou escrito González Tuñón.
Os veciños implicados nesta voracidade racista contaxiosa temen, pobriños, as actividades delituosas dos xitanos. O tráfico de drogas e cousas peores. Os medios e a propia administración amósanse comprensivos e preocupados, tamén. E dan por boa a falaz escusa ao non a impugnaren radicalmente, ao comprenderen os sofismas veciñais paranoicos. E velaí que esquecen, todos, algúns detalles importantes. Que todo cidadán é inocente mentres non se demostre o contrario. Que os xitanos son cidadáns e teñen os mesmos dereitos ca os demais. Que existe unha lexislación, un Código Penal e un longo aparello coercitivo do Estado. Que non son xitanos precisamente os grandes traficantes. Que hai respectables delincuentes de traxe e gravata en urbanizacións de luxo, con oficinas e despachos. Que todos estes veciños antepoñen a súa subxectiva sensación de seguridade, relativa para quen vive en sociedade, aos dereitos dos demais, dos externos aos seus castelos de fume. Que contra estes honrados veciños tamén son de aplicación as leis cando os seus actos non só son racistas senón que tenden a anular dereitos doutros cidadáns.
Racismo sen edulcorar. Chamémoslle polo nome, como merece. Como recoñece un dirixente veciñal, fachendoso, ante a pregunta de se é racista. Si, son racista, que pasa. Outros individuos marcan as vivendas dos xitanos como os nazis marcaban as súas vítimas. Non é toda Galicia, non. Non é a maioría. É unha minoría ínfima. Pero porta un virus tan perigoso como odioso. E nin sequera iso abonda para alentar a actuación política e dos poderes públicos. Ao revés. No mellor dos casos, o silencio e o ollar ao outro lado son as respostas. Cando non, a lexitimación dos actos máis escandalosos, do cinismo racista. O alcalde de Pontevedra terá que ocupar un merecido lugar na historia polo seu boicot ás familias xitanas realoxadas en Monteporreiro. Pretender cortarlles a auga e a luz e impedir que pintasen e axeitasen as súas casas mentres esixía os seus certificados de antecedentes penais é a actuación política de máis altura de todas cantas coroan o seu periplo como alcalde. O seu papel nesta farsa elévao á categoría de paradigma do dirixente racista. Todo un exemplo. Cabo del, a súa socia de goberno, do PSOE, Teresa Casal. E Telmo Martín, construtor, bo representante da ideoloxía e dos intereses do seu grupo político. Ao Partido Popular ninguén o privará do pracer de se relamber nesta enchenta. Parabéns para todos. O nome de Luciano Sobral, alcalde de Poio, soa a dignidade no medio de tanto ruído ruín.
Para lle poñer o ramo á obra, a Vicepresidencia da Xunta de Galicia propón crear guetos baixo custodia policial, grande achado progresista asumido polo Presidente Touriño cando o único deber dos poderes públicos é garantir os dereitos fundamentais daquelas familias que viron a súa dignidade esmagada, dos que sofren inxustiza e trato racista. Se había de estar a carón dos maltratados, a administración recúa temerosa e propón o gueto policial. A proposta dos chamados poboados de transición controlados por forzas policiais lexitima as protestas, toma partido ao tratar de delincuentes a todos os homes, mulleres e nenos de raza xitana. Parabéns.
Hai uns meses, na urbanización Os Verxeles, situada en terreos públicos do concello de Teo, os veciños decidiron boicotear a instalación dun centro de acollida para menores. O sentido da propiedade exclusiva, o temor á mestura, o ideal de pureza en xogo. Ao que se anunciaron mobilizacións, Vicepresidencia recuou e renunciou ao proxecto antes de poñelo a andar. Puido máis o medo ca a necesidade. O representante do PSOE en Teo, Jano Leis, repartiu persoalmente, casa por casa, un texto que merecería entrar na antoloxía da traxedia de non ser que o seu estilo e o seu contido emparentaban mellor coa farsa. Entre veciños temerosos de que baixase o valor das súas propiedades por culpa de que vivisen nunha casa de acollida da urbanización cativos sen familia tradicional e o dereito deses nenos desamparados e con problemas de socialización, a Xunta de Galicia e o PSOE de Teo tomaron partido.
Entre os febles e os fortes, saben sempre a quen escoller.
Eu tamén. Eu escollo xitanos e nenos.
Comentarios (39)
Concordo na maioria do texto, pero como sempre é tan facil falar despois dos acontecementos, fago de menos SOLUCIÓNS E ACTUACIÓNS CONCRETAS: que se poderia facer antes? q se pode facer agora?
-Por exemplo, se a Xunta pecou de algo foi de non anteciparse aos posíveis acontecementos coma estes: talvez facendo reunións cos veciños antes das recolocacións, tanto de familias xitanas como no caso dos nenos sen familia.
-Explicar con métodos modernos as recolocacións exitosas noutros concellos ou mesmo levando aos mais reticentes a velo in situ.
-Alguén propón algo mais?
Parabéns polo teu artigo, é a primeira vez que o silencio vergoñento queda rachado.
Eu tamén escollo os esmagados, xitanos e nenos.
Dáme noxo ter uns políticos tan covardes.
galicia si, galiza creo que non.
Sociedade mercantilizada igual a sociedade idiotizada. Vales tanto como tés. Os individuos teñen valor na medida en que producen e consumen. Non son persoas son consumidores. Viva a razón instrumental. O ser humano non é un fin en si mesmo, é un medio para outra cousa: o diñeiro, que sobre todo gañan algúns á conta duns cantos millóns de tontos que se cren Rockefeller porque teñen un coche de 30.000 euros e un pisiño hipotecado e que desgraciadamente algún morrerá antes de velo pagado completamente. Porca miseria humana para catro días que vivimos. Chegaremos lonxe así: o tempo que tarde en derreterse a Antártida, despois ese montón de ladrillos a algún serviranlle de tumba e a outros nin para iso.
O gran triunfo da despolitización da cidadanía conseguírono as hipotecas e xa podes escoller entre dúas grandes forzas que son iguais no fondo (só difiren levemente na forma) e sen unha alternativa real. Que pobreza de democracia: escoller entre o malo ou o pior...
Parabéns..Excelente artigo!
Também estou com os ciganos e com as crianças, e contra todas as manifestações xenófobas e racistas.
Abraço
Facía ben falta un artigo asi. Algo que rompese o silencio, por un lado, e polo outro, os berros.
ca paulatina imposición do capitalismo no occidente de europa, moitas tradicións foron caendo en desuso ou directamente foron abolidas polos lexisladores afíns a este sistema económico e social en nome do progreso e da liberdade. baste con rememorar a importancia que as festas tradicionais, de fondo contido relixioso pero tamén de lúdico intercambio comunitario, tiñan en galicia non fai moitos anos e como foron barridas dos calendarios a fín de "racionalizar" a semana laboral.
esos cambios en pos dunha maior versatilidade á hora de convivir cun réxime tan pouco humanitario como é o capitalismo, deron lugar ó que moitos hoxe denominan " sociedad actual", " sociedad avanzada", "sociedad democrática" e varias denominacións máis que non deixan de ser máis que meros paliativos consoladores dunha realidade ben máis oscura e insolente. moitos de eses trocos vémolos hoxe perfectamente nítidos e témolos, algúns, interiorizados como formas convenientes e cabais de relación social: dende enviar o xubilado á residencia como antesala da morte a pasear ós nenos por distintas aulas e escolas o non ter tempo de atendelos no fogar até abandoar as tradicións festivas clásicas, tal e como se expoñía na cima, para santificar todo no altar do traballo. todo a maior gloria do mercado laboral, da competividade e do progreso que nos trae as lavadoras que secan a roupa e o coche automático alimentado con gasoil ademais da realización persoal que non somos capaces de acadar noutros niveis.
o pobo xitano foi, pois, moito más fiel as súas tradicións e non se amosou tan permeable os beneficios do sistema económico imperante. de ahí que cando un de eles enferma, unha grande cantidade de familiares se aposte a súa beira no hospital mentras que nos, os grandes integrados nos valores do mercado e pontificadores da nosa realidade como a máis depurada das fórmulas evolutivas para o xénero humano, apenas topamos tempo para chamar por teléfono a ver como está ese familiar cercano o que acaban de operar a corazón aberto. por eso non resulta moi de estranar que nos chamen payos, con certo desprezo e aire de superioridade o entenderen que os xitanos son un pobo ben máis humano e cabal que este outro que tilda alegremente de sudacas e payoponis aos inmigrantes sudaméricanos.
o que así se pode razoar é que o pobo xitano está menos domesticado e quizás esa certeza de representar ante nos, os cosmopolitas de salón, esa imaxe de rebeldía, de forza da natureza primixenia á que nos decidimos renunciar para transformarnos en meros consumidores, pode inducirnos a velos como elementos perigosos, pero eso é por que estamos mediatizados e como bos ignorantes sempre estamos a ter medo de aquelo que non somos capaces de entender, resultando o asunto do tráfico de drogas unha convinte coartada para o noso racismo, a mesma que empregan por certo os estados unidos contra as farc, contra os talibáns ou contra o que denominan " enemigo interior " e que soio intenta lexitimar a súa política invasora e corrupta.
ignoro as condicións económicas nas que estas persoas acceden á propiedade dos seus inmobles anque entendo que, a maiores de algunhas axudas as que en moitos casos temos dereito tódolos cidadán, todos pagan por eses accesos, por esas propiedades e a creación de eses grupos de oposición ó concurso de estes cidadáns a establecerense nun determinado punto non pode nin debe ser consentido polos poderes públicos.
si logo estes xitanos teñen algún comportamente delictivo, que eses poderes os sometan o seu arbitrio tal e como se faría con calquera outra persoa, pero o feito de impoñer políticas preventivas tamén na convivencia non augura nada bon a esta sociedade galega. aquí non temos nin precisamos " enemigos interiores ". si alguén teme que non se lle revalorice o cuarto bé do bloque tres por que alí viven xitanos ou si alguén teme que o neno na piscina lle colla algún xermen tóxico por compartila auga co pobo romaní, está no seu direito e poderá tomar as medidas oportunas tales como vivir ou bañarse noutros lugares, pero será imposible convencerme de que leva razón.
Vou discordar.
1) Que poida haber xente racista entre os que rexeitan a presenca dos colectivos_xitanos_desprazados_de_povoados_coñecidos_comunmente_polo_tráfico_de_drogas como realoxados preto das súás casas non quere dicir que sexa o racismo o que move á xente que se está manifestando. (Nego que as manifestacións sexan contra "os xitanos" en xeral. Son contra algunha xente en concreto).
2) Ós xitanos se lles pode chamar tan racistas como ós veciños que os rexeitan. Tan pouco se integran os uns como os outros.
3) É imposible demostrala inocencia de acusacions como as que se verquen neste e outros artigos de prensa e os que o escreben o saben. ¿Porque eu non son xitano non podo queixarme de que van trasladar xunto á miña casa a un traficante de drogas porque dase a casualidade de que o traficante é xitano, sen que se me chame racista? ¿Porque eu non son muller non podo queixarme da discriminación respecto das custodias nos tribunais sen ser acusado de machista? ¿Porque eu nacín eiquí non podo queixarme de que os inmigrantes están contribuindo a cargarse a miña cultura sen ser acusado de xenófobo? O políticamente correcto sirve para o que sirve: para ser respetuoso nas formas, pero facer do politicamente correcto un eixo de raciocinio e poñelo como límite para a análise da realidade é camiñar cara as cavernas.
4) ¿A alguén se lle plantexou aplicarlle os mesmos criterios de "sensibilidade social" os realoxados respecto do resto da sociedade, ou sexa aplicar a corresponsabilidade social? Onde esta o respeto polo resto de cidadans que si pagan impostos (lembranse dos conflictos en pontevedra co tema das vendas ambulantes non hai moitos meses)? ¿Onde está o respeto para co resto de cidadáns que teñen que mercala vivenda no mercado libre en vez de construila casa no medio dunha rúa (lémbranse que todo isto se produce porque hai xente que a pesar de conducir un ou varios BMW construiu a súa vivenda fora de calquera respeto polas leis)?
5) Onte eu tiña unha finca que valía 10.000. Dende o día en que me mudaron a este paisano a finca xa so vale 5.000. ¿Qué pasa? ¿Que isto non é unha queixa lexítima? Se por algo se diferenza Galiza do resto do estado é porque eiquí é donde hai máis propietarios. ¿Algún sodes dalgunha familia que non ten nin unha leira?
6) Eu so consigo entender unha cultura diferente nun territorio diferenciado. Calquera outra situación é transitoria no curto prazo. Semella que eles tamén e por iso se agrupan en poboados dentro dos que impera a súa propia lei. Entón haberá que darlles un territorio no que eles poidan seguir vivindo como viven se queren. Se non teran que pasar polos mesmos aros que pasamos todos. (Xa me van a acusar de querer criar ghettos, pois claro e que os ghettos son a resposta que as culturas diferentes inseridas nun territorio alleo dan á súa non_inserción na cultura dominante creando unha zona na que eles son maioritarios e na que dominan o espazo que ocupan). Por certo con esta xente levamos convivindo centenas de anos e estamos onde estamos. Nós teremo-la culpa pero eles tamén terán a súa parte.
7) Por último, os que eiquí son responsables son os representantes das nosas institucións públicas e privadas e non os cidadáns. Como sempre dende hai un tempo, xurden as voces enganosamente sensatas que baixo grandes conceptos (baleiros) queren tirarlle de volta a responsabilidade ó cidadán. Non hai que caer nestas trampas.
"Os inmigrantes están contribuindo a cargarse a túa cultura"?
Ú-la túa cultura,tabeirón?
Tenho entendido que entre os próprios romanis (não a "raza xitana", que isso das raças é para os cavalos) há várias atitudes: 1) Os que querem permanecer nos mesmos lugares, mas com vivendas e em condições dignas; 2) Os que querem mudar-se, mas permanecer juntos nas comunidades actuais; 3) Os que querem mudar-se a outras zonas, mas não necessariamente juntos. As atitudes têm a ver, por exemplo, com valores sobre a "família estendida", sobre o mercado de trabalho, etc. E, como em todo colectivo, há também variadas posições sobre a identidade colectiva e a etnicidade, que as organizações romanis se encarregam (como em todo processo de construção identitária) de articular e espalhar.
De facto, para o Estado o mais fácil seria deixar os romanis nas concentrações onde estão. Algumas zonas delas sim que são verdadeiros guetos, que não são "vigiados" pola polícia, e onde se pode "exercer a delinquência" fora das ruas cêntricas livremente, e com a firme oposição dos próprios residentes romanis. Manter a economia da droga e dos ofícios "sujos" é uma das funções dos guetos. Outra é deixar os romanis praticamente fora do sistema educativo, com a conivência de muito professorado. As duas funções (e outras) estão ligadas.
Claro que há racismo e etnocentrismo na Galiza actual. No capitalismo, é socialmente impossível que não o haja. Mas a generalização "Galicia/Galiza racista" não serve para nada, porque, em primeiro lugar, a generalização "Galicia/Galiza" tampouco serve. O título do artigo é uma auto-flagelação baseada na essencialização tanto da etiqueta "Galicia" quanto da etiqueta "raza xitana". Porque, para começar, as pessoas romanis que residem aqui são cidadãos e cidadãs --evidentemente, como diz o texto-- mas cidadãs e cidadãos GALEGOS, e portanto fazem parte de "Galicia".
É significativo que em todo o texto os "xitanos" são só "xitanos" ou "familias xitanas" (nunca "veciños xitanos"), enquanto os "veciños" nunca são "paios" nem "familias paias" (isto é: 'não-romanis', do ponto de vista dos romanis). No texto há, portanto, um deslocamento habitual das categorias de descrição dos grupos: para um, utiliza-se também a categoria "racial", mas para o outro só a categoria cívica (isto é, o termo não marcado). E este tipo de deslocamento procede e é típico do discurso racista, no sentido mais amplo.
Observa-se o mesmo tipo de deslocamento noutras expressões, também racistas neste sentido amplo: "Havia um galego (categoria étnico-cívica, um espanhol (idem) e um negro (categoria "racial")"; "Os alemães (categoria cívica) massacraram os judeus (categoria "racial")" (como se os judeus da Alemanha não fossem cidadãos alemães não germanos), etc.
Coido que o fundo do artigo é acertado, mesmo cas correccións do Celso.
Para min que unha moi boa parte dos "contra-manifestantes" son carne de dereitona (acerta ben Antón nas descripcións). E para maior abondamento, danse as manifestacións contra outros grupos DISTINTOS do PP.
Desde logo que os erros son de grande bulto: deberan estar reintalados nos propios lugares de cercanía, próximos, o máis lonxe, dentro do propio Concello.
Os concellos deberan depender de sí mesmos e non de outras instancias.
E hai o maior erro de base: a droga distorsiona íntegramente todo o asunto. O €$tado NON está pola DESAPARICIÓN do COMERCIO DA DROGA, como sobradamente ben amosando durante décadas.
Parabens polo artigo.
É díficil integrarse nunha sociedade cando esa sociedade te rexeita, seguro que é maior o noso rexeite a que se poidan integrar que o seu para non facelo. Creamos ou non o pobo xitano non ten as mesmas posibilidades ca nos, non ten as mesmas facilidades para que os bancos lles presten, para que lles aluguen un piso, e para moitas cousas mais, polo tanto deben ser os poderes públicos os que se mollen axudando a súa integración, facilitandolle o que lle negan os poderes privados. Son eses mesmos poderes públicos os que deben garantir que os delincuentes esten onde deban estar, sen importar de que raza ou condición son, o mercadeo coas drogas non é exclusivo do pobo xitano, os roubos non son exclusivos do pobo xitano, a morosidade non é exclusiva do pobo xitano, o asasinato non é exclusivo do pobo xitano, que fácil é pisar ó mais debil e canto silenzo dos poderes públicos por temor a perda de votos.
O poder público debe ser valente e defender a xustiza, sen pensar unicamente en manterse no poder, pensando en que a súa obriga é garanti-la igualdade que tanto se pregoa, respectando a constitución, protexendo ó mais necesitados e facendo cumpri-la lei.
BRILLANTE, con maiúsculas. Parabéns, Antón Dobao, polo artigo. E tamén pola valentía de POR FIN falar así de claro. Grazas.
Alén de tanto discurso benpensante conviría formular algunha cuestión de orde práctico:
Alguén se preocupou de preguntar a esas persoas ás que se trata de realoxar, se desexan vivir unhas a carón das outras? A miña experiencia dime que hai algunhas que, podendo elixir, prefiren vivir lonxe dos que afirman compartir unha etnia común, para poder desenvolver con maior liberdade o seu proxecto vital.
Se esta opción fose maioritaria, probablemente desaparecería o conflito que enfronta a uns cidadáns con outros xa que falariamos da convivencia entre persoas individuais e non entre grupos sociais diferenciados (con todas as agravantes ou atenuantes que se queira)
Escacho a rir com esta esquerda de progresso que quer armar “campos” de transição, e mais com os cidadãos aflitos pela possível perda de valor da sua propriedade. É-vos o que tem o capitalismo popular. Esses que protestam pelas ruas são dos que pensam que os direitos das pessoas derivam da condição de proprietário, como já dizia Locke.
Un bello niño de junco,/anchos hombros, fino talle/piel denocturna manzana,/boca triste y ojos grandes,/nervio de plata caliente,/ronda la desierta calle./Sus zapatos de charol/rompen las dalias del aire,/con los dos ritmos que cantan/breves lutos celestiales./En la ribera del mar/no hay palma que se le iguale,/
Ni emperador coronado/ni lucero caminante.
É difícil pôr-se no lugar dos deserdados, dos ignorantes, dos miseráveis. É mais doado passar o tempo a olhar para a pornografia com que nos deleitam os mídia, e morrer de inveja pelo seu estilo de vida verdadeiramente cívico, avançado e democrático, com todas essas zorras a meter-se pela cona vibradores de diamantes e os outros, nos seus desportivos, farinha pelo nariz...
Galicia Racista, non. Hai xente racista en Galicia? SÍ.
Eu vivo na cidade da Coruña, aquí houbo moitos realoxamentes e nunca houbo problemas, realoxamentos de Veiramar, Orillamar, Oleoducto, As Rañas, etc., todos eles feitos con rigor e éxito, sen ningún tipo de conflicto.
Que pasa agora? Penamoa é un lugar conflictivo porque alí está o mercado da droga. Eso non quere dicir que todos os que alí vivan se adiquen a venda de droga (xitanos ou paios que tamén viven alí).
De Penamoa vai ser realoxada a xente que esta empadroada, non a xente que foi agora alí a vivir para se aproveitar da situación. A xente delincuente (que trafíca) non será realoxada, se teñén dereitos daráselles cartos en compensación, ademáis no adoitan a vivir alí só a manter os seus "negocios".
Novo Mesoiro é racista? NON, pero os que arman os conflictos sí, teño amigos vivindo no barrio é escoitei de todo, dende a fruteira que dí que non quere xitanos porque se lle entran na tenda e lle tocan o xénero ninguén llo vai mercar, ata que nas vivendas de VPA, nas que quedaron por vender a maioría dos pisos de 4 habitacións, e donde van ir vivir porque todos teñen familia numerosa.
Son catro pero os medios de comunicación danlles publicidade e fan que teñán máis apoio. Un dos últimos incidentes no que cortaron o tráfico en Alfonso Molina, todos os medios de comunicación deron como noticia certa que un automovilista pillara a un manifestante, FALSO, o ocorrido foi que unha manifestación ilegal, un corte no que invadiron a calzada un automovilista, como podería ser calquer coruñés farto de que corten o tráfico por calquer cousa, decidiu seguir a marcha, e un dos manifestantes subiuselle e agarrouse ao capó deixándose caer cando viu que este non paraba.
Pois ben porque os medios de comunicación venden o que non foi, porque teñen interés en publicitar a catro pelagatos para que teñan máis forza e máis apoio. Que intereses teñén os medios de comunicación.
Por que temos que inventar poboados de transición se de sempre os realoxos se fixeron sen nengún trauma ou conflicto nos outros barrios.
Quizáis esa xente de Novo Mesoiro non lle molesta os realoxos senon que quiten o mercado da droga, quizáis lles molesten os traficantes, e non lles molestan os consumidores disfrazados de xente de ben que alí viven, e quizáis teñán o mono cando lles quiten o mercado da droga e se vexa realmente quenes son, racistas ou consumidores?
Felicítoo polo seu artigo Sr. Dobao, cumpre perfectamente cos dictados politicamente correctos do progrerío benpensante.Unha vez máis trátase o tema do "racismo" como arma interesada, falemos de campos de concentración de masacres de xudeus e tamén do Führer, que iso dalle mais contundencia ao texto.Vostede trata este tema como lle convén.O de escudarse no susposto racismo é xa unha leria moi vella das que souberon sacar proveito moitas persoas,entre elas os xitanos que pretenden realoxar.
Dígame vostede que é racismo? Que lle regalen a alguén un piso mentras o resto da viciñanza ten que pagar hipótecas a 30 anos? 20 anos sendo o mercado da droga do noroeste da península e aínda cuestiona que os veciños non se manifesten? Vostede ten puta idea do que fala? Sabe como vive esa xente(entre ratas,fogueiras e xeringas usadas)? Coida que poderían integrarse? Non será vostede outro progre máis que vive nun chalé ás aforas pero que lle gusta falar do que nunca lle vai afectar?
Tranquilo que sempre quedarán as leis,esas leis que condenan todo o racismo agás o que atenta contra os galegos.
croiosdetector, di: "galicia si, galiza creo que non. Xa me explicarás se non son dous nomes ou as variantes dun mesmo nome para referir unha mesma cousa. Se te refires a que os que usan Galiza -como o criticado Quintana no artigo- non son racistas terás que ver isto pra perder a credulidade: http://www.youtube... (amais reitegracionistas).
É certo Kalaikoi, como non vai joder que lles regalen unha vivenda a alguén mentras outros teñen que pagar a hipoteca? E que alguén cobre cartos dos meus impostos sen traballar tamén debería ser eliminado (fóra pensións non contributivas e seguro de desemprego!)Por suposto a esa xente encántalle vivir entre ratas e xeringas usadas, e se os seus fillos aprenden a roubar desde cativos, aínda mellor porque así estarán mellor preparados cando toque soster á familia. Porque eles non queren traballar, aínda cando teñen todo ao seu favor para sacarse un par de enxeñarías e as empresas acoden direitiñas a eles para ofrecerlles traballo, eles non queren!!! Canto mellor se está nun poboado chabolista que se pode cantar e bailar toda a noite.
Está claro que hai xente progre benpensante e outros que simplemente non pensa. Vai dar unha volta ver se a momia de Lenin está en bo estado, que é máis teu estilo
Celso di: "Observa-se o mesmo tipo de deslocamento noutras expressões, também racistas neste sentido amplo: "Havia um galego (categoria étnico-cívica, um espanhol (idem) e um negro (categoria "racial")"; "Os alemães (categoria cívica) massacraram os judeus (categoria "racial")" (como se os judeus da Alemanha não fossem cidadãos alemães não germanos), etc."
Entón a nación sen territorio, como eles mesmo se denominan, dos xitanos ou romanís, teñen que renunciar a súa identidade étnica por ser suxeitos de dereito no Estado Español? Ou romaní é unha categoría étnico-cívica e xitano non dentro do marco xurídico español?
É discutible que o racista sexa, por presupor unha compresión racista do receptor, ter que precisar que os semitas eran tamén alemás e que cando se di que os alemás os masacraron non se está a un referir ao concepto de cidadán alemán senón a unha grande parte da étnia alemán de cidadanía alemá.
Tamén pódese enterder como racista pensar que xudeo sexa unha "categoría "racial"". Como ben se dá a entender o racismo non é unha cuestión "racial" (rasgos taxonómicos que cada cultura diferencia -e non sempre pra mal-): negan os xudeos de Israel ser da mesma "raza" semita ca os palestinos?
Dixo Chávez que a belísima Naomi Campbel lle dera o seu apoio porque era negra e moi lista xa que entendeu que en Venezuela a loita era tamén unha loita racial.
Kalaikoi, creo que o que non ten puta idea do que fala es ti?
Que saibas que non todos os que viven en Penamoa, son xitanos, que saibas que non todos os que viven en Penamoa se adican a venda de droga, que saibas que a hai xente que vive en Penamoa que non atopa traballo porque no seu carnet pon que viven en Penamoa ou sinxelamente porque son xitanos.
Se hai que ser xustos e solidarios, pois se é, e se os meus impostos serven para que esa xente poda vivir en mellores condicións, e poidan ter ou mellorar as suas condicións de traballo ou de estudo, e sair da pobreza e do mundo da droga, digoche que non me doe.
Quizáis prefiras botalos a outra zona alonxada da cidade como se fixo cando os botaron da Gaiteira para construir El Corte Inglés, se de aquela se actuase como se debería agora non teríamos este problema.
Quizáis vivas no teu piso de superluxo con hipoteca a 30 anos, e quizáis ese piso-burbulla non te deixa ver a realidade, nin integrarte co resto da sociedade.
concordo co teu artigo, antón, e mais con algunhas puntualizacións posteriores. (que xa o escribín no seu día.)
só quería deixar aquí unha pequena nota marxinal: o verso de tuñón que citas vén precedido no poema doutro que, a coñecedor da fala rural arxentina, déixalle claro que o sentido da cita non é o que ti lle dás. o poema dicía "inocentes como animales/y canallas como cristianos". "cristiano" na fala do gaucho significa "persoa" (en contraposición a "animal" do verso anterior). esta acepción vén recollida no dicionario da academia, por certo.
cando cedrón canta este poema, de feito, pronuncia "crestianos" que é a forma fonética propia do gaucho (e non a súa, tan porteño el).
e non digo que cristiano (no realacadémico sentido) non sexa canalla moitas veces (cfr "galiza é racista"). nin mesmo digo que tuñón non o pensase. pero o que di o poema, posto no seu contexto cultural é estoutra cousa.
Parole, parole, parole... é doado escribir desde un ordenador na paz dun chaleciño, pero se realmente nos puxésemos na pel dun veciño que acaba de mercar un piso nunha destas neobarriadas, con hipoteca a moitas décadas, nenos pequenos, etc. veriamos se habería racismo ou non. O desfile cotián polo acceso a Penamoa desde o Ventorrillo é absolutamente patético... Mellor non teñades xamais un problema cos ocupantes do Hyundai Coupe bicolor, do Opel Calibra tuneado, do Megane idem etc, ¡Como para telos preto de ti ou dos teus fillos! Eso é delicuencia dura, non racismo. Foille moi cómodo ó anterior alcalde deixalos que se fosen aí metendo e facendo o que lles petase ; agora o problema aumentou como unha bola de neve.
Se me asomo, podo ver a pouca distancia da miña ventá unha vivenda ocupada por xitanos. Vivían aí antes ca min. É xente que traballa nos mercados vendendo roupa e levo aquí máis dunha década e nunca houbo nin o máis mínimo problema.
Como ti dis elrr, eso é delincuencia dura, pero ninguén se manifesta para que non vaian delincuentes, senón xitanos esa é a diferenza, e porque? porque quizáis os ocupantes do Hyundai Coupe bicolor, do Opel Calibra tuneado, do Megané, etc., vivan preto ou sexan un deses que teñen o piso nun barrio da cidade, pero que a ninguén lle molesta.
Quizáis todo esto remate cando vexamos como delincuentes non só aos traficantes, senón aos consumidores, porque goste ou non tamén estan a incumplir a ley.
Eso non quita que se lles trate como enfermos e se poñán todos os medios necesario para sair de ese mundo, pero tan digno é facelo cos consumidores coma cos vendedores.
Eu tamén vivo dende fai máis de catro anos nun barrio como o de Elviña no que viven moitos xitanos, nunca tiven ningún problema, tamén digo que sitios que venden droga, pero como o hai en todos os barrios da cidade.
Quizáis o que debería de haber e tolerancia cero cos vendedores e os consumidores, porque non todos son xente con pinta de delincuente e que van ca xeringa, tamén hai pais e mais de familia, empresarios, xovenes e non tan xovenes, que toman cocaina, que seguramente non aparente tanto ser consumidor, pero están ahí e todos os coñecemos, ou máis ben dito facemos que non o sabemos.
Coa palabra "racismo" solucionamos o problema moi doadamente. Seica estamos falando dun colectivo que ten como única diferenza co resto dos cidadáns a cor da súa pel: non hai problema social ningún. É un mero cambio de domicilio, e xa está. Moita hipocrisía vexo en tanto "progre" de vida fácil e vivenda acomodada. Porque non esquezamos, que estes "racistas" son xente de bairros baixos, que nos altos nunca se dá este estigma. Se alguén tivese noticia dalgún realoxamento en zonas con alto poder económico rogo que me ilustre, porque teño a sensación de que a "xustiza social" sempre corre a cargo dos mesmos.
Soberbio artigo, fermoso, ferinte, pon o dedo na chaga. Eu fun á escola alí a Feáns, de cativa, e xa daquela a xente de alí, obreiros, na súa meirande parte, xente sen moitos cartos, labregos a tempo parcial, moitos deles rexeitaban ós xitanos que ían ó colexio público e non querían que os seus fillos xogasen con eles. I é que aínda entre os pobres hai clases, pero ben, a Lola Flores e outros xitanos con cartos ninguén os rexeitaba...curioso.
Há que lhe dizer a Kappo Kintana que leia o informe de AI sobre racismo em Espanha:
http://www.adn.es/files/ADNFIL...
Artigos coma este son moi necesarios no meio desta auténtica vaga de racismo. Si, racismo como o dos currelas marselleses do Frente Nacional. O racismo é así desde sempre. O racismo inducido na xente obreira pola camándula fascista.
E por suposto, harizti, que "a xustiza social sempre corre a cargo dos mesmos". Para que haxa xustiza deben intervir as persoas que a poñen entre aspas e que sinalan, en cambio, como verdadeiro problema planetario: aos presuntos "progre de vida fácil e vivenda acomodada".
Coñeces aos ricos? Odias ao ricos?
Entendes as manifestacións e accións contra os ricos?
E ti nos falas de hipocrisía?
Concordo cunha idea que vin por aquí e que penso que non contradí o sentido do artigo, é a seguinte: para burguesía é moito máis doado non ser racista no sistema capitalista. O que pasa é que non aproveita moito esta ventaxe e o é nunha ampla maioría.
O nazismo, por exemplo, foi apoiado por unha parte considerable do pobo traballador, pero tamén houbo unha burguesía que quixo seguir atada ao mastro do racismo conservando a posición de Amo desa masa nazi á que dirixiu a tan terrible destino.
Noraboa Meu. Fai boa falta que se lle chame ás cousas polo seu nome. A todos estes de Mesoiro só lles falta o capirote do KKK. Sempre co argumento de que son delincuentes e de que eles tiveron que pagar un piso traballando como se tivesen as mesas oportunidades ca os que nacen en chabolas!!!!!
Excelente artigo.
Romanis=traficantes, Rumanos=ladrões violentos, Colombianos=sicários, Cubanas= putas, .... e assim centos de tópicos lançados a diário nos meios de comunicação. Merque a nossa alarma! Vote-nos, que o imos arranjar!.Isto é recolher o sementado.
Guetos! Guetos! Mas bem longe.
N'A Crunha há certa ONG que um dos trabalhos dos seus activistas é alugar quartos de pensão no seu nome para imigrantes aos que por terem outro cor de pele não se lhes concedia, por muito que pagassem por adiantado. Nem que falar dum apartamento.
E as autoridades, tão socialistas elas, que fazem? Guetos, guetos, e mais guetos.
La Coruña, la ciudad donde nadie es forastero, diz o cartaz! (sempre que tenha dinheiro e a cor da pele correcto)
Mceleiro, descoñeces moito a laboura da cidade da Coruña, no tema da erradicación do chabolismo, xa o dixen nun comentario anterior pero o volvo repetir.
Nesta cidade se erradicaron asentamentos chavolistas en Veiramar, Orillamar, As Rañas, Oleoducto, Labañou, etc. todos eles con éxito, todos eles sen problemas de acollida, todos eles sen problemas de integración.
O que pasa en Novo Mesoiro e un problema de racismo, son catro ben organizados que propagaron as suas mentiras entre os veciños, xa se sabe a mala herba prende enseguida, e que ademáis veuse apoiada polos medios de comunicación que serviron de altofalante a estes racistas.
Non todos os que viven en Novo Mesoiro pensan igual, nin son a maioria, pero o parecen e son xente que pensa que viven en un sitio exclusivo e que teñen privilexios por pagares moitos cartos pola súa vivenda, o pagar moitos cartos pola tua vivenda non te da os dereitos para elixir aos teus veciños.
Sinto vergoña porque esta xente esta a dar unha mala imaxe desta cidade, na que ata o momento viviu os realoxamentos pola eliminación do chabolismo sen ningún trauma, pero esto se silencia e non se da a coñecer, por que?, por intereses mediaticos, resulta máis rendible dar unha imaxe de cidade racista e que non se compromete cos máis necesitados, pero esa realidade que sinalan os medios de comunicación e falsa. Pero vende e da moitos cartos.
Olá Anxo, não pretendia dizer que na Crunha todos sois racistas nem que tudo se faz mal, mas tu sabes que há 3 legislaturas o Paco prometeu erradicar o chavolismo e tirou de excavadora. Ponte Pasagem, por exemplo. O caso de Beiramar(Orillamar?) concordo totalmente que é um excelente exemplo de integração.
Mas Pena-Moa é o gueto criado conscientemente onde foram parar todos os explusados de outros lugares, onde levam reclamando anos e anos água e luz, pavimentado das ruas e recolhida do lixo, mas sempre negados para não "consolidar/tomar propriedade do lugar" os seus moradores. Agora chega a terceira ronda e política de excavadora.
E sim conheço o trabalho de muita gente, bem diferente aos racistas estes. Conheço por citar exemplo anterior o trabalho de Infradomus e outras organizações, que simplesmente com coisas tais como dar-lhes umas camisolas e uma bola de fútebol aos nenos e os por a jogar com nenos "paios" fizeram mais pela sua autoestima e integração que todas as instituições juntas.
Mas o trabalho desde as instituições às que lhe corresponderia não é o correcto. Desde muito antes do Plano Geral de Ordenação Municipal de 1998 está prevista a 3ª ronda, agora é quando se lembram do problema de realojar (expulsar) a aquelas pessoas, as quais tampouco tiveram ali uma vida digna. Eles nunca foram cidadãos, como diz Celso.
O exemplo de gueto criado conscientemente mais significativo é o Bairro das Flores, no franquismo, mas por sorte ali mesturou-se gente de todo tipo e do gueto previsto só ficou a mala fama, a pobreza, e o abandodo das instituições. Nem foi, nem é nem possivelmente seja nunca um bairro de "gitanos".
Non sei se racismo é a palabra apropiada. Quizais sexa máis apropiado clasismo.
Non é Galiza, nin Galicia, nin o resto do planeta. E o home, que mira por encima do ombreiro aos demáis homes que lles parecen inferiores a él. E canto máis saído da merda, máis clasista se cabe.
Por que o cidadán americano xustifica a guerra de Iraq?
Para seguir conservando a merda que ten no seu país. E moito mellor se os que loitan son os hispanos e os negros.
Parabén polo artigo X.Anton, porque aínda que no fondo todos somos clasistas ou racistas nalgún momento, algúns por medo, medo a perder o que temos ou ao descoñecido, é necesario facerse ou que nos fagan de cando en vez estas reflexións, porque pola contra podémonos converter nuns verdugos e uns asasinos.
Exactamente o mesmo ou peor que o que pretendemos colocar a outros colectivos.
Por iso se algunha vez compórtome como un racista agradezo que alguén faga unha chamada de atención á miña conciencia. E se me molesta é que non teño a conciencia tranquila.
Novo comentario
Se xa tes o teu nome en Vieiros, podes acceder dende aquí:
X. Antón L. Dobao
X. Antón L. Dobao naceu en Lugo o 16 de xullo de 1963. Licenciado en Filoloxía Galega, é escritor e filólogo. Desde 1986 é Asesor Lingüista da TVG. Na actualidade tamén é director e guionista de ficción na TVG. Desenvolve como tal o proxecto Un Mundo de Historias, consistente en xerar produtos audiovisuais de ficción baseados en adaptacións de obras do sistema literario galego.
Máis opinións
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto