Vieiros

Na opinión do ministro Caldera o modelo actual xa sería abondo "xeneroso", facilitándolle aos netos de emigrantes o acceso á cidadanía incluso cando o pai xa non nacera no Estado español e a propia lei de extranxeiría establece unha vía de preferencia para eles.

Caldera explicou que na súa opinión non é necesario avanzar máis sobre o actual modelo de concesión de visados especiais para buscar emprego, que xa lles permite aos netos de emigrantes pedir a nacionalidade ao cabo dun ano no caso de que atoparan traballo. A posición manifestada polo ministro durante a súa viaxe por suramérica confirmaría a negativa á solicitude que o goberno galego lle fixera hai pouco de xeito oficial ao goberno español, a prol do recoñecemento da nacionalidade para os netos de emigrantes a través do vindeiro Estatuto de Cidadáns Españois no Exterior.

As críticas de "Fillos e Netos"
"O ministro Jesús Caldera falta á verdade dicindo que cos visados de busca de emprego está cumprindo cos fillos e netos de emigrantes", opinan en Arxentina desde o colectivo "Fillos e Netos de Españois", liderado polo galego Daniel R.Barreiro. Na opinión desta asociación, a eses visados xa abrira a porta a reforma do código civil feita polo anterior goberno do PP.

De paso, lembran que en 2004 e en tempo electoral, o propio Caldera propoñía "impulsar unha nova reforma que amplíe o acceso á nacionalidade en forma realista e viábel, desterrando obstáculos anacrónicos e requerimentos temporais innecesarios para a súa adquisición e recuperación, e corrixindo a persistencia de agravios para situacións que son equiparábeis". A promesa electoral incluiría tamén que "os descendentes até segundo grao terán dereito preferente a adquiriren a nacionalidade sen discriminación respecto aos nados en España".