Vieiros

Vieiros de meu Perfil


Máis Alá

Xestionado por Vieiros
RSS de Máis Alá
Certame de teatro radiofónico da Radio Galega e o Centro Dramático

'O bambán' gaña o primeiro premio Diario Cultural

O xurado elixiu por unanimidade a obra de David Rodríguez, que tamén foi a preferida do público.

Redacción - 19:17 27/03/2007
O xurado do premio, deliberando

O xurado do premio, deliberando

O bambán, de David Rodríguez, foi a obra gañadora da primeira edición do premio de teatro radiofónico Diario Cultural, organizado pola radio autonómica e o Centro Dramático Galego. O xurado, formado por Cristina Domínguez, directora do Centro Dramático; Ana Romaní, directora do Diario Cultural; o dramaturgo Manuel Lourenzo, o crítico teatral Camilo Franco e o profesor Afonso Becerra, decidiu por unanimidade que o texto do autor vigués era merecedor do galardón.

A valoración do xurado coincidiu coa da audiencia, que lle deu 35 votos máis á obra gañadora ca á segunda clasificada, 1.073. A terceira finalista foi O elixido, que, xunto coas outras dúas, se incluirá nun libro-CD editado por Xerais. A publicación presentarase o 18 de abril nun programa especial do Diario Cultural aberto ao público.

Os membros do xurado destacaron a limpeza e a claridade expresiva da obra gañadora, a aposta polo teatro conversacional e a creación dunha atmosfera densa e fluída á vez. Tamén tiveron en conta a adaptación do texto ao medio radiofónico.

Autor novel
David Rodríguez naceu en Vigo en 1975 e actualmente traballa de repartidor en Salvaterra do Miño. O bambán é a súa primeira obra dramática, aínda que tamén é autor do blog O funambulista coxo.

As obras finalistas emitíronse ao longo da programación da Radio Galega do 12 ao 25 de marzo. Estiveron dirixidas por Lino Braxe e interpretadas polas voces de Luís Tosar, Miguel Pernas, Rebeca Montero, Manuel Manquiña e Luís Zahera, entre outros. Da gravación e da montaxe encargáronse Toño Vázquez e Isidro Cea.


4.2/5 (5 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: