Vieiros

A Asociación Galega de Profesionais da Ilustración, AGPI, rexeita o secuestro da revista satírica El Jueves e o peche da súa páxina web. Os ilustradores consideran que os feitos constitúen “un ataque insólito e inaceptábel á liberdade de expresión”, e que son unha “censura retrógrada para a democracia”.

A entidade, formada por máis de 70 profesionais do país, afirma que o secuestro e o peche do portal atentan contra a libre expresión das ideas e resultan “perigosos”. A AGPI di que hai outro tipo de procedementos máis axeitados no caso de que se cometan inxurias ou calumnias, sen ter que chegar a eses extremos.

Por todo iso, os debuxantes galegos solidarízanse cos traballadores da revista, deséxanlles que se restabeleza o seu labor e pídenlles ás autoridades que defendan os dereitos democráticos e revisen as medidas adoptadas contra El Jueves.