Vieiros

Grecia vota este domingo nas eleccións xerais, onde Nova Democracia, do primeiro ministro Costas Karamanlis, e PASOK, de Giorgios Papandreus, disputan uns apertados comicios, cos masivos incendios deste verán de fondo. O voto no país mediterráneo, o segundo máis pobre da UEM, é obrigatorio para as persoas entre 18 e 70 anos.

As 66 vidas e os 3.000 quilómetros cadrados de terra fértil que levaron por diante os lumes do mes pasado poderían ter un efecto determinante nas eleccións ao parlamento grego.

ND, o partido no poder, tira do que foi, ao seu entender, unha excelente campaña de axuda ao desastre. Fronte a isto, as acusacións de neglixencia formuladas polo seu principal opositor -e segundo nas enquisas a sete décimas de distancia--, o Movemento Socialista Paneléenlo (PASOK) de Giorgos Papandreu.

Aínda que o gañador é incerto, todo apunta a que haberá unha Cámara Baixa conformada por cinco partidos (os dous mencionados, mais o Partido Comunista Grego -KKE-, a Coalición da Esquerda Radical -SYRIZA-, e a Concentración Radical Ortodoxa -LAOS, nacionalistas euroescépticos).

Karamanlis anunciou a principios desta semana a súa intención de repetir os comicios antes de permitir un goberno de coalición, porque ao seu entender "a cooperación parlamentaria co resto de partidos é imposíbel". As sondaxes afirman que a porcentaxe de indecisos oscila entre o 13 e o 20 por cento.

O pasado mes de agosto, os lumes arrasaron as rexións de Laconia, Mesenia, Ileia e Arcadia -en total, un 2,3% da superficie do país, e, ademais dos máis de sesenta mortos, acabaron coa colleita estival da uva, dos cítricos e das olivas.

Os agricultores gregos non só perderon os ingresos dun ano enteiro, senón os medios necesarios para subsistir durante as vindeiras tempadas.