Vieiros

A Xunta de Tratamento do cárcere de Teixeiro, en Curtis, solicitou o segundo grao penitenciario para os tres veciños do Eixo, de xeito que poderían ir traballar. A medida teraa que decidir a Dirección Xeral de Institucións Penitenciarias do Ministerio do Interior.

A solicitude confirmáronlla a Europa Press fontes penitenciarias, que afirman que nos vindeiros días se enviará a Madrid un amplo expediente que inclúe a proposta de segundo grao. A Dirección Xeral dispón dun prazo de 45 días para tomar unha decisión.

Os tres do Eixo atópanse nun módulo de réxime normal de Teixeiro, dous xuntos e o máis novo separado. Alí agardan noticias sobre a petición de indulto que presentaron perante o Consello de Ministros os seus avogados, co apoio institucional e social. Simón Márquez, Xosé Moreira e Xesús Montoiro cumpren unha condena de sete anos por teren agredido un axente policial durante unha manifestación veciñal en 1998.

Están convocadas manifestacións de apoio aos tres veciños para este venres 23 de novembro, coa participación de actrices, actores e representantes veciñais, máis unha concentración o día 29, na praza do Toural de Compostela, un concerto o 14 de decembro no Auditorio de Galicia e unha manifestación o 16 de Nadal.