Vieiros

O último accidente nas obras do AVE produciuse este luns en Maside. Un mozo de 29 anos de idade e veciño de Vigo sufriu feridas graves que conlevan a amputación dun pé, logo de que envorcara unha máquina elevadora. Segundo os servizos de emerxencia, o accidente tivo lugar arredor das 8.30 horas no lugar de Figueirido. O mozo foi trasladado ao Complexo Hospitalario de Ourense onde quedou ingresado.

Nos últimos tres meses xa se produciron tres sinistros no tramo ourensán do AVE. O primeiro, ocorrido o pasado día 7 de setembro no Carballiño, acabou coa vida dun traballador e provocoulle feridas a outros catro. O pasado 29 de outubro un obreiro resultou ferido de gravidade no concello de Amoeiro.

Os sindicatos alertan de que detrás dos accidentes hai condicións de traballo precarias. Segundo denunciaron, a présa por acabar a obra fai que algúns operarios cheguen a facer xornadas de até 12 horas.