Vieiros

Vieiros de meu Perfil


Edición xeral

RSS de Edición xeral
"Un 36% máis ca o derradeiro executivo Fraga"

O PPdeG di que a Xunta gastará en 2008 máis de 8,5 millóns en asesores

O PSdeG defende a aposta do Goberno "pola dignidade do traballo e dos traballadores", así como pola "profesionalización da Administración".

Redacción - 18:01 07/12/2007
Afonso Rueda, do PPdeG

Afonso Rueda, do PPdeG

O secretario xeral do PPdeG, Afonso Rueda, denunciou este venres que a Xunta vai destinar en 2008 un total de 8,51 millóns para cubrir os gastos en asesores de gabinete, o que supón un incremento do 36% con respecto a 2005, último ano dos populares á fronte do Goberno.

Rueda revelou que o actual Executivo conta con trinta asesores máis ca o anterior, co que o total de persoal eventual de gabinete ascende a 198, aínda que na web da Xunta só aparecen reflectidos 109. Xa que logo, segundo o PPdeG, estase a incumprir a Lei de Transparencia, que obriga á publicación deste dato.

Os datos publicitados por Afonso Rueda están botados dos orzamentos para o ano que vén e da rede de comunicación interna da Administración. Segundo estes, sete consellarías rexistran un aumento superior ao 25% en relación a 2005.

"Só o Gabinete de Touriño gasta 2,4 millóns, o mesmo que 11 consellerías do PPdeG, e un 50% máis que con Fraga", afirmou, e engadiu que con esta cifra se sufragan os soldos de 74 persoas. No caso da Vicepresidencia, a suba neste capítulo é dun 136% con respecto a 2005, salientou Rueda.

Dignidade dos traballadores

O viceportavoz do PSdeG no Parlamento, Xaquín Fernández Leiceaga, retrucoulle a Rueda ao respecto destas críticas, que "a Xunta cumpre cos seus compromisos e aposta pola dignidade do traballo e dos traballadores".

O deputado socialista afirmou "que o goberno bipartito conseguiu aprobar unha Lei de Transparencia, que se está a cumprir", e que "a transformación dos postos de xefes de servizo en postos de concurso busca garantir unha maior profesionalización da Administración Pública".


4.5/5 (2 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: