Vieiros

O primeiro ministro turco, Recep Tayyip Erdogan, rexeitou este luns dar un calendario para a fin das operacións militares no norte de Iraq contra os milicianos do Partido dos Traballadores do Curdistán (PKK), e asegurou que o seu goberno está a facer todo o posíbel para non prexudicar á poboación que vive na zona.

Durante a súa intervención nos Almorzos Informativos da axencia de novas Europa Press, Erdogan asegurou que agarda que "a nosa loita contra o terrorismo acabe moi cedo", e recordou que aínda que a autorización do parlamento turco só é por un ano, o goberno podería pedir unha ampliación.

O primeiro ministro turco quixo deixar claro que o seu país apoia "a integridade territorial, a tranquilidade e a estabilidade de Iraq e seguirémolas a apoiar".

Loita contra o terrorismo
Por outra banda, Erdogan considerou que "a loita contra o terrorismo é un dos retos máis duros da Humanidade" e a súa derrota "só é posíbel en colaboración global". "As bombas que mataron a centenares de persoas en Istambul en 2003, en Madrid en 2004 e en Londres en 2005 seguen a estourar hoxe en Iraq, en Líbano, en Afganistán e en Paquistán", dixo.

Segundo este, non se pode dicir "o meu terrorista é bo e o teu é malo" posto que "o terrorismo non pode ter escusas nin xustificacións". Neste senso, criticou que "algúns círculos" consideren a determinados terroristas como "loitadores da liberdade".