Vieiros

O vicesecretario xeral do PSOE non quere unha reforma electoral que se limite soamente a garantir o voto emigrante en urna. Esta petición conxunta de todos os partidos do Parlamento quédase pequena para as aspiracións de Blanco, quen non quere que a modificación desta lei sexa "froito dun arrebato ou impulso". O dirixente socialista avoga por unha reforma máis "global", que a mude integramente para adaptarse mellor ás necesidades actuais do proceso electoral.

Ademais, Blanco defende unha reforma de consenso e di que "xamais se modificará a normativa electoral sen o consentimento do Partido Popular. Nesta liña, recorda que o tema está a ser estudado polo Consello de Estado, polo que aínda é cedo para coñecer as posturas das diferentes formacións políticas ao respecto.

No referente á petición do voto en urna para a emigración nas vindeiras eleccións galegas, asegurou que "é un procedemento que ten moitas complexidades", derivadas na súa maior parte ás distancias que separan a electores e consulados. "Cremos que hai que buscar mecanismos para facilitar o voto en urna, pero que sexan compatibles co voto por correo, porque se non estariamos a minguar os dereitos dos emigrantes", dixo o vicesecretario xeral do PSOE.