Vieiros

Vieiros de meu Perfil


Edición xeral

RSS de Edición xeral
15 mil embarcados quedarán sen votar

"É máis doado que voten os mortos de Suramérica que os mariñeiros galegos"

Os socialistas acusan ao BNG de querer eliminar o voto emigrante porque non lle é favorábel. Os nacionalistas retrucan que ao PSdG non lle interesa introducir reformas para que voten os embarcados.

Redacción - 18:30 22/12/2008

Entre 10 mil e 15 mil mariñeiros galegos quedarán sen votar nas vindeiras eleccións. Por estaren embarcados na flota de altura, de gran altura ou da Mariña Mercante perderán o seu dereito a exercer o voto o vindeiro 1 de marzo. Así o denuncia o deputado do BNG, Bieito Lobeira, quen asegurou que esta cuestión non se soluciona porque "este colectivo é libre e non tan manipulábel coma outros", ao tempo que subliñou que "é máis funcional caciquear co voto emigrante".

Así, exixiu que se constitúan mesas electorais a bordo das embarcacións, delegando como funcionario responsábel do proceso ao capitán. Considera que esta medida é "tecnicamente viábel" e puxo de exemplo a países como Suecia, malia a ter "unha flota máis pequena que a galega". En contestación, o secretario xeral da Consellaría de Presidencia, Santiago Roura, subliñou que xa existe un grupo de traballo nas Cortes para reformar a Lei Electoral e que estuda, entre outros puntos, introducir unha reforma deste tipo.

Voto emigrante
Lobeira criticou que os descendentes da diáspora poidan exercer o seu dereito ao sufraxio sen coñecer a realidade política galega e contrapuxo esta realidade coa do voto exterior: "mariñeiros que naceron aquí, viven aquí, teñen as súas familias aquí e pagan os seus tributos aquí, non teñen o mesmo dereito". Na mesma liña se manifestou o portavoz parlamentar nacionalista, Carlos Aymerich, quen lamentou as declaracións que previamente fixera o vicesecretario xeral do PsdeG, Ricardo Varela.

Nunha entrevista radiofónica, o socialista acusou ao BNG de "querer eliminar o voto da emigración" porque "a penas ten votos, só un tres por cento". Ao tempo, asegurou que "a principios de ano estará feita unha proposta por parte do partido" para a reforma do voto dos galegos do exterior. Carlos Aymerich contestou a estas declaracións e cualificou de "curioso" que Varela coñeza con tanta exactitude a porcentaxe de voto no exterior que van obter os nacionalistas o 1 de marzo. Finalmente, aserugou que o que quere o BNG é "que vote quen realmente teña dereito a votar, con garantías de limpeza e transparencia".


Ligazóns

5/5 (2 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: