Vieiros

Non se sabe se Tucho decidiu emanciparse ou se foi Tonecho quen o botou da casa, pero o dúo cómico máis importante da televisión galega nos últimos sete anos anuncia a súa separación temporal. Non é unha ruptura definitiva e a decisión, segundo Roberto Vilar e Víctor Fábregas, non se debe a un conflito persoal. Durante un tempo non definido pola parella, cada actor centrarase en proxectos artísticos individuais. Hai quen fala que Roberto Vilar (Xove, 1971) está embarcado nun proxecto profesional en Miami, algo aínda non confirmado. Víctor Fábregas (Esteiro-Muros, 1971) tamén comezará a traballar en solitario.

Nestes momentos a TVG xa está emitindo episodios repetidos do Show dos Tonechos, o seu exitoso programa, que estreou na Galega o 18 de abril de 2005. Nos seus tres anos de emisión acadou unha cota de pantalla media do vinte por cento, cinco puntos por riba da media da cadea. Os Tonechos déronse a coñecer no programa Con Perdón, aínda que foi a partir de 2002 no Luar cando comezaron a acadar o éxito e a popularidade coa que agora contan. Nos seus espectáculos participan de maneira habitual Dorotea Bárcena (Amadora) e Mariana Carballal (Maribel) e outros actores como Federico Pérez, Toñito de Poi, Alfonso Agra ou Luís Zahera.

Semanas antes das elección xerais do pasado ano, Vieiros falou con Roberto Vilar e Víctor Fábregas para coñecer as súas impresións sobre os comicios.

Mira aquí os vídeos dos Tonechos colgados no youtube