Vieiros

O primeiro ministro israelí, Ehud Olmert; o ministro de Defensa, Ehud Barak; e a ministra de Relacións Exteriores, Tzipi Livni, reuníronse a última hora deste domingo e decidiron reforzar a presión sobre Hamas, informan medios israelís.

Livni sinalou na Radio do Exército que co ataque sobre Gaza, Israel "creou unha nova ecuación, que di que cando os nosos cidadáns son atacados respondemos coa forza".

A ministra non quixo informar sobre cando rematará o ataque, aínda que tanto ela -do Kadima- como Barak -laborista-, que en febreiro se enfrontarán nas urnas, son partidarios de non estender a ocupación, ao contrario que Olmert.

Este domingo, autobuses cheos de reservistas do Exército dirixíronse cara ao sur de Gaza. Mentres, avións de guerra bombardeaban repetidamente o corredor que percorre a fronteira entre Gaza e Exipto.

Israel rexeitou a resolución de cesamento do fogo do Consello de Seguridade da ONU a semana pasada. Tamén Hamas, que o condiciona á fin dos bombardeos e do bloqueo de Gaza.

A cifra de mortos palestinos desde o comezo do ataque israelí, o 27 de decembro, alcanza as 890 persoas, a maioría civís, e o de feridos, 3.600. Segundo Israel, tres civís morreron polo disparo de foguetes, e 10 soldados perderon a vida durante a ofensiva.