Vieiros

Xa informabamos esta semana de que Galiza podería participar o ano que vén nos II Jogos da Lusofonia, que se han desenvolver en Lisboa e nos que participan as seleccións dos países lusófonos en oito modalidades deportivas: atletismo, baloncesto, fútbol, fútbol sala, taekwondo, tenis de mesa, voleibol e volei praia.

A pasada cuarta feira de mañá a directora xeral para o Deporte, Marta Souto, reuniuse en Lisboa cos principais responsábeis do deporte portugués (entre eles o presidente do Comité Olímpico Portugués, José Vicente Moura) para tratar o tema, e ao terminar a xuntanza, segundo informacións de Deporte, o clima era bo e as posibilidades de acudir aos Jogos, abondas.

Unha vez chegue o permiso do COE...
Mais agora só queda conseguir o permiso do Comité Olímpico Español (COE), que precisa Galiza, mais as negociacións están avanzadas.

O único que aínda está por pechar son as condicións nas que participaríamos nos Jogos da Lusofonia, e hai dúas posibilidades: que Galiza vaia como país convidado en tres ou catro disciplinas deportivas ou que sexa un país máis dos que participan nestes Jogos (xunto con Angola, Brasil, Cabo Verde, Guiné-Bissau, Guiné Ecuatorial, a India, Macau, Mozambique, Portugal, San Tomé e Príncipe, Sri Lanka e Timor Leste).