Vieiros

Este ano os XIV Xogos Náuticos do Atlántico (até 2007 coñecidos como Xogos Náuticos Intercélticos) desenvolveranse en Euskadi, nas cidades de Getxo e Sopelana, entre o 19 e o 25 de xullo.

Galiza despraza, nesta edición, 71 persoas; 28 delas representantes da Federación Galega de Vela (26 participantes e 2 monitores); 9 participantes da modalidade de remo e 1 monitor da Federación Galega de Piragüismo; 6 participantes de kaiak de mar e 8 de kaiak polo e pista; e 19 representantes da Federación Galega de Surf, dos cales 17 son participantes e 2 monitores.

O ano pasado o combinado galego de piragüismo, surf, vela, remo e actividades subacuáticas competiu en Morlaix (Bretaña), onde conseguiron moi bos resultados, sobre todo en remo e piragüismo.

Os Xogos Náuticos do Atlántico
Estes xogos organízanse dende 1995 e, co paso dos anos, foron gañando popularidade, ao tempo que se convertían nun referente para os deportes náuticos (vela, surf, kayak, remo, submarinismo, remo e vela a motor).
Ademais de deporte, son varias as actividades que se han desenvolver este ano e que completan un importante programa cultural que aportan as distintas rexións celtas e as rexións do Espazo Atlántico Europeo.