Vieiros

Vieiros de meu Perfil


Euskadi

Edición xestionada por Vieiros
RSS de Euskadi
No fútbol

Os xogadores vascos néganse a xogar coa súa selección se non se chama Euskal Herria

Presentaron un manifesto no que se arrepoñen á decisión da federación de denominala 'Euskadi'. Este ano habían xogar no Nadal contra Irán.

Redacción - 18:55 13/11/2008
Euskal Herria

Euskal Herria

Nun comunicado, emitido esta quinta feira, e asinado pola práctica totalidade dos xogadores do Athletic Club de Bilbao, unha ducia dos da Real Sociedad, outra do Eibar, varios do Deportivo Alavés, algúns internacionais, ex xogadores de renome e varias xogadoras dos equipos femininos do Athletic e da Real, pídese que a selección de fútbol vasca manteña o nome de 'Euskal Herria'. Do contrario, os asinantes aseguran que non van participar no partido que se desenvolve no Nadal, organizado pola Federación Vasca de Fútbol, e que este ano os ía enfrontar a Irán.

Ao parecer, a selección de fútbol sempre se denominou 'Euskadi', a non ser o ano pasado, no que, a petición dos propios xogadores, mudou o seu nome polo de 'Euskal Herria'. Este ano, a Federación Vasca decidiu volver á nomenclatura anterior, cousa que non convenceu aos e ás futbolistas, segundo recolle este comunicado (enteiro, mais en éuscaro): "Eles tomaron a decisión de recuar, eles non cumpriron a palabra dada, e agora son eles os que teñen que arranxalo. Se non é así, nós non imos xogar o partido. E a preocupación vai ser súa", pódese ler neste escrito, enviado aos medios de comunicación do país.

Euskadi ou Euskal Herria?
Ámbalas dúas denominacións son totalmente distintas. A primeira, Euskadi, significa en éuscaro, País Vasco, é dicir, o que administrativamente se coñece como tal no Estado Español, a saber, as provincias de Álava (Arava), Biscaia (Bizcaia) e Guipúscoa (Gipuzcoa).

Euskal Herria, porén, significa "país do éuscaro", descrito pola Sociedade de Estudos Vascos como "un espazo ou rexión cultural europea, situada a ámbolos dous lados dos Pirineos e que comprende territorios dos estados español e francés. Polo tanto, coñécese como Euskal Herria o espazo no que a cultura vasca se manifesta en toda a súa dimensión". Baixo o nome de Euskal Herria englobaríanse, ademais de Euskadi, Navarra (Nafarroa) e as tres provincias que pertencen, administrativamente, á República Francesa (a Baixa Navarra, Nafarroa Beherea; Labort, Lapurdi; e Sola, Zuberoa).


5/5 (9 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



O ano pasado, os xogadores da selección vasca no partido contra Venezuela
O ano pasado, os xogadores da selección vasca no partido contra Venezuela
Case todo o cadro de xogadores do Athletic, tamén Andoni Iraola (na imaxe), asinan este comunicado
Case todo o cadro de xogadores do Athletic, tamén Andoni Iraola (na imaxe), asinan este comunicado