Vieiros

Vieiros de meu Perfil


Edición xeral

RSS de Edición xeral
EN PORTUGAL

A Unesco felicita a Ponte... nas Ondas!

A asociación defendeu no parlamento luso os seus valores para que o patrimonio galego-portugués forme parte da Lista Indicativa do Patrimonio Cultural Inmaterial.

Redacción - 08:00 16/06/2009

"Agora é o momento de volver a insistir na petición do recoñecemento ao patrimonio cultural inmaterial galego portugués", asegura Lurdes Carita, vicepresidenta de Ponte... Nas Ondas! e cabeza visíbel da entidade en Portugal. A consideración xorde ao fío da celebración esta segunda feira do Coloquio sobre Patrimonio Cultural Inmaterial no parlamento portugués.

Baixo o título de A face intanxíbel do patrimonio desenvolveuse esta xornada da que saíron moi satisfeitos os representantes galego-portugueses: "se ben esta xornada tivo moito de institucional, valeunos para comprobar os apoios cos que contamos para que o noso patrimonio común poida ser incluído na Lista Indicativa do Patrimonio Cultural Inmaterial da Unesco", di Carita. De feito, a maior satisfacción tivérona logo da primeira intervención de Fernando Brugman, responsábel da sección de Patrimonio Cultural Inmaterial da Unesco: "dunha banda, coñecía perfectamente o proxecto, polo que non fixo falta realmente explicar moito máis; e doutra felicitounos polo traballo feito e polas boas prácticas na liña de salvagardar este acervo común".

Apoio das administracións galego-portuguesas
Así as cousas, Carita non quere ser excesivamente optimista con respecto ao posíbel apoio de cara a obter a distinción europea. "De momento estamos satisfeitos coas reaccións que imos atopando, se ben aínda non se pode dicir que contemos coa axuda das administracións portuguesas", asegura. "O importante agora é que xa contamos cun importante recoñecemento sobre todo o proceso no que levamos traballando por parte da Unesco; agora o que nos interesa é ver cal é a disposición do Ministerio de Cultura".

No referente á administración galega, a vicepresidenta de Ponte nas Ondas é aínda máis cauta: "nós temos solicitado diferentes xuntanzas e, de momento, estamos agardando a que nos chamen, pero de momento non temos data". No que si confían, dende a asociación é que están a darse os pasos necesarios para que o patrimonio galego-portugués obteña o recoñecemento da Unesco: "sabemos que estamos no bo camiño", asegura Lurdes Carita.


Ligazóns

4.38/5 (8 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Ponte Nas... Ondas! comezou sendo un proxecto de radio entre escolas das dúas beiras do Miño
Ponte Nas... Ondas! comezou sendo un proxecto de radio entre escolas das dúas beiras do Miño