Edición xeral
Quintana reclámalle ao Estado que colabore no financiamento das galescolas
Anunciou que non rescindirá os convenios de adhesión ao Consorcio aos alcaldes que aseguren que asinaron voluntariamente.
O vicepresidente da Xunta pediulle á ministra de Educación que colabore na cofinanciación das galescolas e do desenvolvemento da Lei de Dependencia. Anxo Quintana entrevistouse en Madrid con Mercedes Cabrera dentro da rolda de contactos concertada polo ministerio coas diferentes comunidades autónomas en materia de política social.
Segundo o vicepresidente, o resultado da xuntanza foi positivo, tanto pola convocatoria como pola "disposición" da ministra. Quintana aproveitou para salientar a importancia da Lei de Dependencia, pois no país hai 95.000 persoas dependentes, das que xa presentaron solicitudes 46.122. Anxo Quintana engadiu que xa se valorou máis do 60% das recibidas e anunciou que o proceso estará completo antes da volta do verán.
O vicepresidente expresoulle a Cabrera o desexo de "seguir executando" o convenio de colaboración estabelecido na anterior lexislatura, dotado dun cofinanciamento de 60 millóns de euros para atender a rede pública de atención á dependencia en Galiza. Tamén anunciou a construción de 55 novos centros de día en 2009, para o que é precisa a colaboración do goberno español.
Galescolas
Así mesmo, Quintana presentou o obxectivo de chegar ao 33% de prazas públicas no ano 2010, conforme ás directrices europeas, fronte ao 11 por cento deixado polo Goberno anterior. Para iso, lembrou, "precisamos a colaboración da Administración estatal".
Ademais, o vicepresidente garantiu que non anulará os convenios para a adhesión de escolas infantís ao Consorcio de Servizos da Igualdade e do Benestar sempre e cando os alcaldes do PP que criticaran o acordo "aclaren que non asinaron coaccionados, senón voluntariamente". Sinalou que "non existe ningún proceso de rescisión" no caso dos rexedores que rectificaran as súas críticas públicas. De feito, tres dos oito alcaldes do PP enviáronlle cartas de desculpa.
Quintana asegurou que "a miña sinatura nunca estará nun convenio en que a outra parte diga que no asina voluntariamente" e que "optei por rescindilos porque os convenios de colaboración son voluntarios: se alguén di que os asinou pola forza é nulo de pleno dereito". Tamén aclarou que ningún concello foi expulsado do Consorcio.
Lembremos as declaracións feitas polo alcalde de Vilamartín de Valdeorras:
Novas relacionadas
- Alcaldes do PPdeG recoñecen que criticaron o Consorcio por presións internas
- Quintana rescinde por carta as galescolas acordadas con oito concellos do PPdeG
- "É insólito que un partido reprenda os seus alcaldes por asinar un acordo"
- O Consorcio de Igualdade e Benestar quere ter 85 galescolas funcionando este ano
- O PPdeG volve denunciar o "afán ideoloxizador" das galescolas
Comentarios (4)
Conta con "ilo" Quin, conta. E se lles sobran cartos que financien tamén as bandeiras do Día da Patria...
"Así mesmo, Quintana presentou o obxectivo de chegar ao 33% de prazas públicas no ano 2010, conforme ás directrices europeas, fronte ao 11 por cento deixado polo Goberno anterior."
11% .... 33% .... Iso ten que estar á forza errado señores de Vieiros. Como é isto posíbel nun país occidental, libre e democrático como é o Reyno de España...
"o vicepresidente garantiu que non anulará os convenios para a adhesión de escolas infantís ao Consorcio de Servizos da Igualdade e do Benestar sempre e cando os alcaldes do PP que criticaran o acordo "aclaren que non asinaron coaccionados, senón voluntariamente""
Pero QUIN que dis? Isto si é coaccionar !! Como podes dicer que ou aseguran que asinaron voluntariamente ou os votas? A veces é ven mellor estar caladiños...
#2 xosse, eu coido que xuridicamente un convenio non ten validez se foi asinado baixo chantaxe. E iso é o que sucede, se din que foron coaccionados, pasa a quedar invalidado. Polo de agora as únicas coaccións semella que foron as do PP para que criticasen.
Eu refirome as declaracións de QUIN nas que di que non anulará os convenios daqueles que aseguren que non foron coaccionados.
Que eses alcaldes se desdigan voluntariamente.... VALE, pero que o teñan que facer forzosamente para eludir a anulación dos convenios é unha chantaxe, e ademais feita públicamente por QUIN -ler a nova de arriba-.
Logo virá o Sr. Rueda e o Sr. Feijoo dicindo que a estes alcaldes non lles quedou mais remedio que amosar o seu arrepentimento para non perder as inversións nos seus pobos, forzados polo vicepresidente... e terá RAZÓN!
Por iso dixen e manteño que esas declaracións feitas por QUIN están demais. O que quisera desmarcarse da liña do PP tiña que facelo por vontade propia -como o fixeron os primeiros- e non porque saben que "hai premeio".
Novo comentario
Se xa tes o teu nome en Vieiros, podes acceder dende aquí:
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto