Vieiros

Vieiros de meu Perfil


HAI QUE ROELO

Impotencia

09:45 17/07/2009

Pararse un chisco a observar a realidade galega deixa sen folgos. Hai algúns meses, cando a Xunta aínda estaba nas mans de PSdeG e de BNG, alertei nun artigo das dificultades, cando non incapacidade, que tiñan estas dúas forzas de liderar o debate político e asentar opinión na cidadanía sobre aspectos que son chave de bóveda no noso desenvolvemento como País. Non é que non teñan ideas conformadas, é que son incapaces de transmitilas con claridade.

Se non acadaban os seus obxectivos cando estaban no goberno, non vos quero contar agora que se atopan na oposición e aínda se moven coma pitos sen cabeza, que diría John Benjamin Toshack. Durante o goberno compartido entre socialistas e nacionalistas había cuestións de interese social nas que o poder era incapaz de marcar terreo. Sempre o Partido Popular, coa inestimable axuda do seu brazo mediático, era quen de poñer temas enriba da mesa que facían sentir fondamente incómoda á Xunta, aínda que eses asuntos foran en orixe responsabilidade do PP. Velaquí algúns exemplos:

-O Gaias. Non sei se lembrades que ás beiras de Compostela había un monte que se estaba destruíndo para facer alí a Cidade da Cultura. A idea fora do PP no seu conxunto: orixe, deseño, prazos e execución. Cando o anterior goberno decidiu que se faría cun proxecto que superaba todas as raias do admisible, na sociedade xa callara a idea de que semellante invento fora cousa de Touriño e Quintana, con Ánxela Bugallo como última responsable. Hoxe ninguén se pregunta que pasa coa Cidade da Cultura.

-O TAV (malchamado AVE): durante os catro anos de PSdeG e BNG falábase seguido do tren de alta velocidade. Non sabíamos moi ben para que se quería, cal era o deseño e por onde se debían facer as conexións cos nosos veciños, pero había que falar del cada día. Repetíase que iamos ser os últimos en poder empregalo e culpábase de tal mal a Madrid e a Santiago. Pasaron as eleccións e nunca máis se soubo. Nin hai TAV nin se lle agarda. Tampouco sabemos que é o quere a actual oposición.

-Financiamento. Como explica de xeito brillante Pablo González Mariñas nunha entrevista n’A Nosa terra, Galiza tería claras as súas cifras se tivéramos aprobado un novo Estatuto, pero hai dous anos para a opinión publicada no País o Estatuto non lle importaba a ninguén e só debiamos ocuparnos dos problemas reais da xente. Agora resulta que os que teñen Estatuto renovado acadaron un bo financiamento e Feijoo non dixo nin que si nin que non ao proxecto. Iso si, o noso Presidente faise o simpático en entrevistas por Madrid día si e día tamén.

-O galego. Antes o problema eran as galescolas, a imposición e os impresos da administración. Agora seguen sendo, pero non sabemos cal é o modelo do PP. Sábese que fixeron unha enquisa á súa medida, pero pouco máis.

Podería citar máis casos, pero con estes abonda. A oposición é incapaz de facer chegar o seu discurso á xente, mentres o PP, que non ten proxecto para nada, está gobernando e semella que se lle perdoa todo.

Ou socialistas e nacionalistas comezan a empatizar coa cidadanía, a falar claro e a construír discurso, ou o PP aséntase para moito tempo. Xa vale de laiarse. Unha cousa é que nos queiran vender que o novo goberno é de tecnócratas, e outra que a oposición non sexa capaz de denunciar que en realidade son grises que non amosaron ningunha idea nin proxecto. Con esta oposición, calquera pode gobernar.

4.44/5 (18 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Dani Álvarez

Dani Álvarez

Naceu nas Pontes en 1977. Marchou para Euskadi estudar Xornalismo. Logo de licenciarse, comezou a traballar en Radio Euskadi. Na actualidade dirixe o programa radiofónico "Ganbara", de información xeral e debate. Canda Xabier Lapitz coordinou o libro "Proceso de paz en Euskadi. 20 voces por la normalización".



Máis opinións