"OTRA VACA EN EL MAIZ"
O día que toleou Virginia R. Mateos
Eran as sete da mañá. Era martes 24 de xuño. Entre grolo e grolo do café con leite de máquina estaba eu a ler o FARO dese día. Coma sempre, só reparaba nos titulares das novas e non en todas. Ata que cheguei á carta que unha lectora lle mandaba á Redacción, e alí enfociñei. A escribidora respondía ó nome de Virginia R. Mateos.
Dicía a individua (eu son moito de Bibiana Aído) que “el afán liberticida nacionalista no conoce límites. No contentos con haber obligado a desterrar el español escrito en Galicia, pretenden que tampoco lo hablemos…”. A esas horas recentes do día, co motor a ralentí e lagañas nos ollos, pois asusteime, que queredes que vos diga.
¡Era visto! ¡Os meus amigos do Bloque aló van no monte, coas escopetas da armería Álvarez ó lombo e a boina estrelada ben encasquetada ata as orellas! Pensei en chamar a Quintana para que mo confirmara, pero axiña desbotei a idea por consideración a Cristina e mailas crianzas, que moi seguro durmirían daquela felices e inocentes.
Imaxinei o que me esperaba ó chegar ó quiosco da Praza Maior. Alí estarían os exemplares de A VOZ DE GALICIA, de O PROGRESO, de A NAZÓN (antes A Rexión, antes La Región, antes nada que non existía), de O PAIS; todos e con todo en galego. ¡Miña naiciña! Incluso o MARCA e mailo AS relataban en galego as patadas triunfantes da Vermella e as eternas desculpas do Fernando Alonso. Incluso O MUNDO e A RAZÓN viñan en galego, incluída a columna de don Federico, coa mesma acedume na palabra, pero en galego. ¡Meu Deus! ¿Era ou non para asustarse o que estaba pasando?
Estaba tan asustado que non era quen de volver pasar as follas do FARO e comprobar así a desfeita. Porque se Virginia levaba razón, eu viña de ler o FARO en galego e nin conta me dera. Así que xuntei as forzas necesarias, volteei o xornal e comecei a miralo dende a primeira folla. ¡Nada que vai para ningures!. A portada estaba en castelán, as follas do Deza e Tabeirós tamén, e tamén as de Galicia, España e mais as do Mundo Enteiro. E tamén as dos deportes. Incluso os mortos seguían morrendo en castelán, coma onte e antonte, coma sempre.
E logo Virginia, ¿por que dixera o que dixo? Namentres arrimaba a barriga ó mostrador para pagar, pensei que Virginia toleara e sentín mágoa por ela. A desconexión da realidade é un dos síntomas de case todas as enfermidades mentais e a pobre tiña todas as trazas de padecer unha ou de estar a piques de.
E sendo así, ¿o FARO por que publicaría a carta? ¿Tamén perdeu el o contacto coa realidade? ¿Ou é que publica todo o que lle chegue, veña de onde veña, poña o que poña?
Comentarios (20)
polo grado de tolemia a "R" debe ser Ruíz da familia Mateos. Como vello amigo que son da familia Álvarez, máis pola pesca que pola caza, sei que frecuentas bastante as instalacións coa boina estrelada, mais estrelada en azul...
O día que os grandes medios de comunicación do país empreguen o galego sen complexos a batalla poderemos falar dunha mínima normalidade. Mentres, Galicia Bilingüe e outras tribos falan dunha imposición marciana de non se sabe ben que.
Coido que V.R. Mateos vive no pais de Fedeguico o Glande. Tendo en conta que nese pais Don Mariano Rajoy é definido como "maricomplejines que ha dejado en manos de la rojeria internacional los despojos de nuestra ahora fragmentada patria....". Penso que xa tes unha idea de como é o pais que che digo.
O malo non é que toleen eles o peor seria que coas súas toleadas remataran toleándonos a todos.
Saúdos dende Galiza....ou agora será Galicia?. Ou vivimos nos dous e non nos decatamos?. Quen sabe, se cadra e unha terra e dous espíritos.
Parabéns polo artigo señor Sucasas.
Señor Sucasas,¿pero que fai tan cedo levantado? ¿E que xa non descansa na cama? ¡ui! Seica imos para vellos...
Hai unha cousa que a min me chama a atención: por que non hai un xornal minimamente 'progresista' en Vigo que lle faga competencia ao Faro? A tradición xornalística progresista na cidade é inmensa até a guerra civil (de xeito continuo) e trala ditadura con algún pequeno exemplo (A Folla do Luns e Diario 16, collido todo entre pinzas).
A min fódeme pensar todas as vendas que ten o Faro, con esa ideoloxía monárquica, dereitosa, peseteira e agresiva contra os nacionliastas e mesmo co galego (sen que todos sexan nacionalistas). Moita xente que merca o Faro non o fai por simpatía con el senón por coñecer as novas da súa cidade ou comarca. Algúns deberían matinar en facerlle fronte ao Faro de Vigo e darlle resposta a dexenerados como a tal V.R. Mateos, a G. Lago e toda esa pandilla cun novo xornal de corte contrario ao Faro.
Señores Carl, Edreira, Aldara e Condedelrio: cando xunte uns cartiños de "libre disposición" eivos convidar a unha pulpada, polo consideración con que tratades as miñas ocorrencias.
Unha aperta.
de momento a pulpada e o polo caseiro xa o poño eu o xoves. Estounos cebando ben, que comentan por aí que os "vieiros" papan a Deus...
O que precisamos é un medio xornalísico EN GALEGO xa, que defenda os nosos dereitos. Do resto non se pode agardar nada, son prensa española e os do grupo Moll (Faro, La Opinión, etc.) son de aupa. Servos da españolidade máis cutre. Non hai que mercalos.
Cando o BNG coidará nun medio GALEGO?
Cando un galego deixa de argallar faise un "mergullador ex cathedra" e deso por desgraza cada día temos mais, e falan, e falan, e escreben, e escreben......e nin o demo os entende. Non se decatan de que Galiza é dende a AP-9 ata o Cebreiro o outro dende que descubrín o Jujel penso que é Jalisia.
Eu poño o queixo, cando vostedes queiran.
Apertas.
Bon, si tanto eres da Aído, "arnegueiro", entón serás Sucasos, que Sucasas serán elas. Haberaias tamén, ou?
Non só toleou Virginia, mais temos un Sucasas para compensar a presión!
Ecoe, ti tamén estas invitado. Pero se edreira pon o queixo, ti tes que poñer a orquesta.
Que tiña que haber un xornal galego e progresista en Vigo (e non só) témolo claro...mais ú-los cartos?
Pasade pola web de Oscar Pereiro para que medite a súa adhesión ao
"Manifiesto por la lengua común".Ten cara de ser bo rapaz.
Esse meio que tanto procurais já existe: o Novas da Galiza (novasgz.com), único periódico deste país não submetido a qualquer partido político (é igual de criticado desde o BNG que por Nós-UP) ou poder económico.
O único defeito é que é mensal :p Se tendes algo mais de premura (e não vos importa luxar a vista com moreias de publicidade institucional), um jornal progresista recomendável é também A Peneira, que é quinzenal (apeneira.com).
Só uma cousa: qualquer uma destas iniciativas, que são muito modestas (sobretudo o NGZ) precisa de grandes investimentos económicos. Já sabeis: menos queixa e mais euro, laretas!
Non hai dous sen tres: tras de Virginia, que xa nolo dixeron, agora o da bici de Mos e mailo estirado de Verín.
Que faga algo o Sucasas, anque sexa un ex-conxuro! ou aquí vai pasar algo con tanta EPIDEMIA
Que se extende, demo!
Coido que este ano vai haber moitos capóns na feira de Vilalba.
O palco señor Sucasas xa o pon a Xunta, falta o viño, a empanada e unha boa queimada. Boh!, tamén levo eu a empanada. E non vos poñades farrucos, imos ter moitos mais capóns galegos de aquí o Nadal e algún deses de reviravolta e media.
parabéns polo xeito tan gráfico de describir a realidade do galego no noso País. Penso que o compromiso individual tamén é moi importante, polo que me resulta moi triste ver fillos de galegos falantes como falan en exclusiva o español
Carallo! (e aquí permíteme a licencia que non sexa da Aído...), para unha vez que hai "incentivo" eu estaba mirando cara outro lado. Fáltavos o pan (de Antas) para mollar no aceite.
--Eu barrenei tamén algo semellante nestes últimos días; claro que a miña dicción semántica non é tan fluida coma a tua, pero -cada galo dende o seu poleiro- vai cantando como pode--
Xa temos o necesario: pan, polbo,queixo, viño...Esto vai collendo boa pinta.
Chousa, estou ó corrente dos teus barrenes, alomenos os que fas públicos.
Novo comentario
Se xa tes o teu nome en Vieiros, podes acceder dende aquí:
José Luís Sucasas
José Luís Sucasas Fernández naceu en 1959 en Cadrón(Lalín). Economista e enxeñeiro técnico informático, concorreu en 2003 e 2007 nas listas do BNG do seu municipio. Como escritor publicou dúas obras: O paxaro que ninguén ve (2002) e Soñaron buratos na terra (2003).
Máis opinións
- Estamos feitos de consumo e produción (28/06/2009)
- Imos de mitin, ¿vés? (21/06/2009)
- A maioría silandeira (14/06/2009)
- O noso é chuzar (07/06/2009)
- A realidade contada (31/05/2009)
- Máis política. Menos relixión (24/05/2009)
- Na proclamación de Guillerme andei por aí (17/05/2009)
- Éxito e glamour na Consellaría de Economía e Industria (10/05/2009)
- Buzlightyear (03/05/2009)
- As ideas e mailas persoas (26/04/2009)
- Xogo, especulación, empresa (19/04/2009)
- A factura do hospital (13/04/2009)
- Economía de primeiros auxilios (05/04/2009)
- Por onde entra a calor, o frío tamén pode (29/03/2009)
- O cumio do G-2500: A refundación do nacionalismo (22/03/2009)
- O poder psicotrópico dos números (15/03/2009)
- Ademais o tractor é meu (08/03/2009)
- Eu tamén son K (01/03/2009)
- O futuro xa está aquí (22/02/2009)
- ¡Mira que somos reparados! (15/02/2009)
- Antroido electoral (08/02/2009)
- Balance dunha lexislatura (01/02/2009)
- Economía: Lección 1 (09/01/2009)
- A descuberta do punto G da economía (17/11/2008)
- A maldita especulación (03/11/2008)
- A proclamación de Quintana: eu non estaba alí (10/10/2008)
- A propósito de Steiner (16/09/2008)
- A historia sen fin de Santiago de Zebedeo (02/09/2008)
- As cousas como son, aínda que non o parezan (14/08/2008)
- Economía: lección 0 (28/07/2008)
- Hai un paquete para ti (17/06/2008)
- Deus, Eurovisión e nacionalismo (05/06/2008)
- Os beneficios para min, as perdas a repartir (22/05/2008)
- Galegos na corte do Rei Carolo (29/04/2008)
- A democracia no rural: 5.000 palcos da música (17/04/2008)
- Brainstorming á galega (03/03/2008)
- Así coma quen (17/02/2008)
- Eu non son español (01/02/2008)
- O inventor da apañadora de votos (24/01/2008)
- O primo de Rajoy e mailo meu cuñado cambote (08/01/2008)
- A xénese da cor maxenta (21/12/2007)
- Hai algo alén da política e dos políticos? (09/12/2007)
- Do amiguismo á discriminación positiva (20/11/2007)
- Un respecto para a política (08/11/2007)
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto