LUGAR DOS ROMANZINHOS
Dura aprendizaxe
A vitoria do PP e a derrota do PSOE e do BNG nas eleicións deste 1 de marzo foron tan curtas en termos de voto popular (47,1% contra 46,5%) como grandes en significación política e estratéxica. Nos resultados puderon influir circunstancias externas como a crise económica e o tratamento dado á mesma polo Governo do Estado español ou as posicións belixerantes de medios de comunicación galegos e estatais. Mais creo que a causa última estivo na ausencia dun proxecto nacional mobilizador ou, sí se quer, na carencia dunha idea orientadora da acción común.
O traballo do Governo galego nen sequer incorporou obxectivos ambiciosos praticábeis no campo de posibilidades do actual Estatuto de Autonomía e do Orzamento disponíbel, tais como un decidido apoio ás familias para a superación da crise demográfica; a reforma da organización territorial, nunca empreendida; a recuperación e preservación da singular natureza do país; o reforzamento da presenza internacional da industria e das demais actividades produtivas; a potenciación do sistema educativo e da sanidade pública; a definición inequívoca dun aeroporto central e internacional; a normalización do uso da língua galega como lingua nacional e intercontinental ou o desenvolvimento da consciencia de Galiza como un país capaz de estar presente por sí mesmo no exterior, varrendo a ideoloxía da dependencia necesaria a respeito de Madrid…). O Governo debeu fuxir como do lume de que o reparto de consellarías entre as dúas organizacións dese lugar a unha irresponsábel despreocupación polas decisións tomadas polo outro compoñente do Executivo ou derivase na manifestación de desacordos recíprocos en materias sensíbeis e de grande repercusión pública, como ocorreu inclusivamente na proximidade do período eleitoral. Poden estar aí claves suficientes para explicar a derrota.
Dito isto, e xa no campo do nacionalismo, non se pode ignorar que os cativos resultados do BNG nestas eleicións constituiron a consecuencia última de decisións internas tomadas a partir de 2001, cando malia descender lixeiramente en voto popular, conservara a condición de segunda forza política conquistada en 1997. En 2001 acabara un ciclo eleitoral e social expansivo baseado na oposición aos Governos conservadores que dominaran as instituicións autonómicas desde 1981, coa paréntese de 1987-1989. Estaba aos ollos de todos a fonda mudanza que se producira en Galiza, no Estado español, na Unión Europea e na situación internacional. A sociedade galega pasara de agraria e rural a industrial e urbana. Todo obrigaba a unha reflexión renovadora para o nacionalismo galego conservar as posicións logradas e medrar. Unha parte do BNG así o defendeu.
Porén, as decisións tomadas discorreron por outros vieiros. Descualificaron ao Grupo Parlamentar cando comezaba o seu traballo e desvirtuaron o carácter e a imaxe do BNG, desembocando nunha sistemática caida eleitoral e nun certo isolamento social. A baixada, especialmente forte nos comicios autonómicos de 2005, non foi superada por unha participación no Governo autónomo que, posibilitada pola subida do PSOE, quixo apresentarse como a demonstración de que o nacionalismo galego vivía o mellor momento da súa historia.
Depois da dura aprendizaxe destes anos, o BNG debería facer o que ignorou en 2001: recuperar un propósito político ambicioso, democrático e de esquerdas para a maioria da sociedade, lonxe de tentacións acomodaticias ou intransixentes, vendo a Galiza como unha nación no mundo. Abrirse á sociedade galega, a tantos nacionalistas, máis que nunca, que non están no Bloque, deixando de constituir un espazo choido. Nese camiño non se deben pretender vitorias internas mecánicas, que reproducirían as causas do fracaso. Non debería ser preciso lembrar que se o PP e o PSOE son os partidos do Estado, tendo asegurada a súa reprodución, o BNG pertence ainda a unha nación sen Estado, dependendo o seu futuro dos militantes e da sociedade galega.
Agora a reflexión necesaria ten que integrar a todos.
Comentarios (52)
#1 Abofé, teria que aguardar polo menos...até o dia 4 :-D
martin32 A algúns non hai quen vos entenda, se o fai antes das eleccións é contra-producente, se o fai despois ventaxista. E se o fai máis tarde unha vez que falaron outros, que vai ser? raiante? repetitivo? machacante? Agora é o momento, agora esta todo o mundo a falar disto e opinión de Camilo dacordo ou non con ela é benvida.
#1: Bom, o Camilo leva anos dizindo isto, assi que não é oportunismo pola sua banda. Reconhecer os erros proe, mas quanto antes, melhor.
Volve Camilo!
Ti e máis Beiras podedes facer ainda moitas cousas por este país.
Galiza precisa de dous partidos nacionalistas como auga de maio, o independentisto e a esquerda por un lado e o galeguismo de centro por outro, non hai posibilidade dun mesmo partido, os resultados do 1-M son claros.
Para dous partidos xa está Terra Galega e o PP. O BNG ten que recuperar o proxecto de esquerdas e un dirixente con capacidade de crear un discurso e que manden a merda os asesores e as consignas, e os raps. Eso non vai connosco. Volve Camilo
Concordo Dumiense, ou mesmo três: o independentismo (Fusión de FPG + NOS-UP), um nacionalismo possibilista de esquerda que deixe de ser tam sectario e que se abra à sociedade cousa que leva impedindo a UPG todos estes anos(BNG) e finalmente o galeguismo de centro, eu persoalmente estou implicado num projecto neste último ámbito, o recem fundado Converxencia Democrática Galega, o obxectivo e propiciar umha fusom a medio prazo com Terra Galega dotando a estes dum discurso aggiornado do que carecem.
Sr. Nogueira:
Interessantíssima e lúcida análise, mas para os que não somos expertos na trajectória do BNG, qual foi exactamente o erro do 2001? Que foi defendido por alguns, e derrotado? Não fica nada claro. Explique-se com clareza pois esse parece ser o ponto fulcral. Que se tinha que ter feito em 2001 que não se fez? Porque suponho que não era simplesmente manter as posições de esquerda marxista e soberanismo, que precissamente eram as que tivera o BNG até esse momento que vostede define como de câmbio de ciclo? Que ideias e estratégias ganharam e quais perderam?
Os meus parabéns Sr. Nogueira penso que mellor non se pode dicir.
Ou adiante ou quedarse espetado.
En poucas palabras, coido que Camilo o nacionalismo galego non soubo adaptarse ás transformacións do país. Pero isto hai moito tempo que algúns o vimos expoñendo en activa e, nos últimos anos, sobre todo, en pasiva, porque a máquina esmagadora da UPG ficou ancorada nunha estrutura que fora válida até finais dos 80. Posibelmente o mesmo Beiras confiou demasiado nese tipo de estruturas e defendeu con demasiado entusiasmo un frontismo que precisamente daba azos á UPG, claro que polo menos el foi coherente coa prédica até que preso desta dinámica acabou por ser defenestrado polos que se viñan beneficiando das maiorías frontistas.
Incluso o propio Camilo houbo de reintegrarse na "casa común" despois da imposibilidade de inserir o seu proxecto socialdemócrata no tecido electoral do país. Seguramente, naquel momento non lle quedou máis remedio e quizás esperaba que o propio Bloque, de xeito "natural", evoluíse cara a un tipo de organización máis acaída aos tempos históricos. En realidade o que aconteceu é que, outra vez, a UPG fagocitou os capitais acabados de se adscribir, mentres que en materia organizativa nada mudaba e en materia ideolóxica, tras a caída do bloque soviético, ficaban espidos e sen norte. No canto de facer un novo recoñecemento das estrutras sociais do país para tentar recoñecer novas propostas e novos proxectos, o que fixeron os enxeñeiros da UPG foi intentar reflectirse, moi mecánicamente, en partidos nacionalistas bascos e cataláns, prescindindo con bastante incoherencia do seu pasado revolucionario para botarse sen demasiada reflexión nas mans da indefenición ideolóxica que caracteriza á socialdemocracia española, esa mesma indefinición que os fai padecer cada vez que se teñen que enfrontar a un PP, porque, basicamente, se desputan as mesmas ideas máis ou menos matizadas.
Como vemos, moitos erros de vulto que puideron ser evitados, ou quizás non. Poderían ter sido evitados se o personalismo das diferentes sensibilidades nacionalistas, incluída a do propio Camilo, Beiras, Paco Rodríguez, Ferrín... non chegase a poñer tantos atrancos e se enlease en debates nominalistas profundamente estériles. Poderían terse evitado se, no canto de gastar inxentes esforzos humanos en campañas contra os intereses españois, se dedicasen a albiscar a evolución da nosa sociedade para ter propostas acaídas aos problemas reais e coetáneos das xentes do país. Poderían terse evitado se, feitos estes deberes de proxección política, tivesen as súas estruturas políticas arraizadas en todos os tecidos sociais e produtivos de Galiza, estrutras a través das cales poderían ter transmitido de maneira efectiva á sociedade que eles eran unha alternativa real ao neoliberalismo depredador.
Pero todo isto non se fixo porque no momento crucial, cando aínda Beiras tiña capacidade, os ideólogos da UPG creron que el non merecía confianza, non vían en Xose Manuel unha persoa que se puidese controlar no momento de tomar poder, por iso lle deron a sua beizón a Quintana, alguén disposto a dicir a todo que si e co ego suficiente para crer que o facía ás mil marabillas... e Beiras, quizás abrumado el mesmo polos cambios que había que apuntalar, cedeu demais até que se decatou que era unha trampa.
Despois do 1 de marzo, púxose de manifesto que o nacionalismo precisa unha reestruturación a fondo e urxente e, a poder ser, sen os responsábeis desta desfeita dirixindo de novo a reconstrución. Do contrario, o proxecto nacerá morto.
Tens toda a razão, Camilo. No PGL ( http://www.pglingua.org/ )abri um assunto em que trato o mesmo tema, embora muito menos esclarecidamente.
Talvez o BNG deveria decidir-se a ser partido com novo nome: Quer recobrar o de Esquerda Galega, ou quer estender o do partido que inclui (Partido Nacionalista Galego).
Talvez... Então as mudanças que propões e que dum jeito ou doutro deverão fazer-se, parecerão realmente mudanças. Em caso contrário, o nome persistente agachará as mudanças.
Ah, e outra cousa:
Também deve mudar-se a "terminologia" que denomina os contrários, de "constitucionalistas", ou assim, a NACIONALISTAS ESPAÑOLES, face aos nacionalistas galegos.
De facto o nacionalismo español é o "verdadeiro nacionalismo", por contar com os aparelhos do estado, a começar pelo exército (art. 8 da Consticutión), como garantia de ser em definitivo o nacionalismo dominador.
Eu concordo co que din algúns por aquí sobre a idea de diversificar a oferta nacionalista. O Proxecto Común tocou teito e non leva mási que a esquizofrenia constante á hora de qurer facer unha ou outra política. Agora no BNG van botar meses a discutir con que se o paso polo goberno foi moi moderado ou moi radical. Que si se gobernou cunha política pouco de esquerda ou pouco valente no trato con empresarios e na conformación dun lobby empresarial galego. Agora ben, tendo ben clariño que se fai, a barreira do 5% segue aí e ou se fai unha cousa ou se fai a outra. Ou se fai unha política ou se fai outra, o que non pode ser é que por falta de referencias políticas claras no galeguismo político, o eleitorado vote en branco, fique na casa ou estea a desanimado cun proxecto que pretende abranguer todo, satisfacer a todos e ao final non ilusiona a ninguén.
Sei que os tempos que veñen tampouco van ser bos para que se dea esta reflexión en profundidade que permita que o nacionalismo medre na diversidade. O que vai primar ao final, van ser as vellas consignas, as chamadas ao atrincheramento e ás políticas de "resistencia".
Ah, mais:
Os partidos nacionalistas galegos (os que forem) devem concordar pelo menos em três pontos: LÍNGUA, TERRITÓRIO E GENTE.
Como nisso bem que concordam todos os partidos nacionalistas españoles, desde aquela Fuerza Nueva até o PC e essa UCE que foi com Galicia Bilingue, passando pelo PP e o PSOE: Tem bem claro que língua é a nacional do reino bourbónico (e como deve manter-se escrita ou formalizada), o território español (incluído Gibraltar) e a gente (el pueblo español e não "naciones" diversas: Una sola nación, la española.)
Obrigado, DanielErreCe polos esclarecimentos.
Eu sou votante e mesmo simpatizante do BNG desde antes do 2001, mas não sendo militante, não conhecia esses detalhes. Então, vejo claramente que existe uma profundíssima contradição no BNG: por uma parte é uma organização controlada por un nucleo de poder que continua a agir como um partido marxista-leninista clássico (com toda a retórica revolucionária, obreirista, frentista) e as conhecidas tácticas de controle, mas aliás, as políticas e estratégias implementadas cara a fora, são socialdemocratas (e ainda menos do que isso) de praxe... Isto lembra muito os destinos da maioria dos partidos comunistas europeus, por exemplo, o PCE: todos eles se rodearam duma organização frentista (Izquierda Unida) que contralavam ferreamente, e com a que tentaram "aggiornar-se", mas as contradições foram tais que afinal os resultados foram desastrosos.
Concordo com a ideai de que há que refundar o BNG como um partido socialdemocrata, soberanista sem complexos, com estrutura de partido moderno. E certamente o Camilo Nogueira seria um bom candidato para dirigir o processo.
Coma sempre o Camilo atinado nas suas reflexións. Eu engadirialle ao rosario de erros cometidos polo bng o de non ter dado protagonismo no congreso dos deputados as duas figuras do nacionalismo galego mais brillantes: Beiras e o propio Camilo. Canto mellor nos iria se en vez de ter a mediocre de Davila e o burrocrata de Jorquera en Madrid, tivesemos a Beiras e Camilo.
Como diz o próprio Camilo e algum que aquí comentou, o BNG (mais nomeadamente a UPG) segue ancorada nos anos 70. Igualmente as análises sociopolíticas e sociolingüísticas seguem alí. Hoje a maioria da população é urbana (ou rururbana, mas com mentalidade urbana), dos sectores terciário e industrial (incluso as novas gentes do agro são mais industriais que primárias -ao estilo dos anos 70-) e, ainda que há quem lhe custar aceitar, castelhano-utentes. Isto não se pode negar. E este foi o electorado (e segue a ser) fidel e que segue ao BNG.
As análises dos anos 60-70 chegavam à mesma conclussão: Galiza perdeu a possibilidade de ter um sector popular com consciência nacional por falta duma burguesia. E, então, a política SEMPRE foi (ainda que nunca se tiver responsabilidades de governo) a de criá-la. O BNG devera coidar as suas camadas populares (votante urbano-rururbano assalariado e com consciência duma Galiza própia, nacional, porém maioritariamente castelhano-utente); e as políticas (que se apresentaram como novidossas) foram outras: criar novo empresariado galego-nacionalista: grupo lácteo galego, concurso eólico, clúster do naval e automoção, grupos de aproveitamento florestal... Todo isso, como lhe afecta DIRECTAMENTE a essa clase urbana-rurubana? A priori, bem pouco. Os réditos de todo isso serão a meio-longo praço. E mentras? Com a crise que temos?
Muitos dirigentes do BNG gostariam de ser um PNV, mas não é factível.
Outro falar é a socio-lingüística. E é que queremos seguir um modelo catalã (de primeira), mas isto não é Catalunha. Por muito apressar, estamos a perdê-lo tudo. e não seria melhor seguir o modelo vasco e assim consolidar utentes conscientes, seguros de seu e com valentia para usarem em toda a ocassião o galego ou procurar apanhar todo contando com professorado não preparado, não disposto ou mesmo transmitindo a ideia de que "falo galego nas aulas porque no-lo impõe".
Cómpre ter claro qual é o nosso electorado, qual a nossa base. Urbana - rurubana, assalariada e castelhano-falante (maioritariamente).
e digo eu, por que a CIG é a primeira força sindical na bisbarra de Vigo (e com diferença) e o BNG cada vez se afunde mais?
olhemos para este modelo sindical que tantos réditos está a colheitar e que, não por acasso, é o principal movimento nacionalista.
Eu também concordo na análise de suso: deixe-mos o cancro que temos. O BNG, mas nem só, todos os movimentos sociais nacionalistas sabem que acontez quando a maquinária da UPG se põe a controlar tudo: que lho perguntem à Mesa, AS-PG, Sindicato Labrego, Comités Abertos, ADEGA e agora... já estão preparando o assalto definitivo à CIG. Só entendem estes movimentos como "correias de transmissão" ao serviço do Partido, para dotá-los de militantes e demais. O erro dos demais foi confiar neles para sair adiante.
Suso acerta bem: olhai para todos os movimentos frentistas cum partido comunista de pensamento único e como remataram. IU é bom exemplo.
Só resta olhar para o que temos: um grupo parlamentar ocupado em exclusiva pelo 60% da organização (UPG e afins)
Meendinho:
Concordo totalmente contigo excepto numa cousa, porem importante: acho que essa base do BNG está no teu texto perfeitamente definida, excepto no seu idioma: não são maioritariamente castelhano-utentes, senão, mais bem, "neo-falantes" de galego. E certo que também há algúm castelhanofalante, mas poucos.
Também concordo na necessidade de dar as graças á UPG polos brilhantes serviços prestados e dissolvé-la. Será duro e triste, mas e o acaido. Já se dissolveu Esquerda Galega no seu momento, e Camilo Nogueira foi um exemplo de generosidade ao antepor os interesses gerais aos próprios. Agora a UPG deve fazer o mesmo e facilitar a refundação dum Partido Nacionalista Galego de estrutura moderna, socialdemocrata, com um compromisso de ação social baseado no altermundismo, no ecologismo, no benestar e a igualdade, com políticas fortes e imaginativas pero fora completamente da retórica marxista do obreirismo e as camadas populares, com um soberanismo sem complexos, mesmo afirmando abertamente um independentismo como possivel via (como faz ERC, e com uma praxe real do inserimento do galego na lusofonia, isto é, a ceitação em igualdade de planos dos dous sistemas normativos.
A UPG pode e deve liderar essa transformação. Senão, deverá fundarse o PNG á margem deles.
Non me parece que a política actual da UPG sexa precisamente de "retórica marxista" nin moito menos. Máis ben todo o contrario, como se ve na política que fai o BNG.
Iso ademais dunha falsa defensa do galego, porque na realidade, á hora da verdade practicamente non se diferencian do PSOE nin do PP nese importante punto. O único que parece importarlles a moitos, non sei se maioría, mais moitos, é ocuparen cargos públicos ao prezo que sexa, incluíndo, por suposto, traizoar a ideoloxía.
Unha vez levaron a un da upg a comisaria por uns disturbios nuha xornada de folga e cando lle preguntaron onde traballaba respostou: no comite de empresa, pero di a profesion: sindicalista. E hoxe a upg converteuse para moitos dos seus militantes nunha axencia de colocación, antes so no sindicato agora en concellos e deputacións. Son moi poucos militantes que so teñen futuro profesional no cargo, e esta é a sua unica ideoloxia. Por iso, nada vai cambiar.
Uns apuntamentos a respeito do nacionalismo, partidos nacionalistas e língua:
1. Nazionalismo y libertad:
Coincido plenamente com o que diz AGIL: quando o BNG fala deles como “nós os nacionalistas” fronte a os outros, os “non nacionlistas” ou “constitucionalistas”, o que está a fazer é aceitar umhas regras de jogo falsificadoras da realidade, o calote do “non nacionalismo”; está a jogar com cartas marcadas pelo espanholismo, e todo o mundo sabe que quando um joga com cartas marcadas pelo contrário, vai perder com certeza. O bloco deve romper e baralha e principiar umha nova partida com cartas novas, e principiar a falar de “nacionalismo galego” ou “galeguismo” frente a “nacionalismo español” ou “españolismo”, porque a maioria da gente asocia “nacionalismo” com intoleráncia, imposiçom, fronteiras, e polo tanto o “non nacionalismo” deve ser o contrário: liberdade, toleráncia, convivencia, universalidade, etc, e com a dialética actual, tanto faz que 2+2 sejam 4, que se o diem os nazionalistas do BNG, é mentira e o que querem e imponher e criar fronteiras, é dizer: com a dialéctica “nacionalismo”-“non nacionalismo” o BNG sempre estará estigmatizado para a maioria da povoaçom galega.
O mesmo que o BNG têm de empezar a falar dos outros como “nacionalistas españois”, tambêm têm de utilizar parte do seu discurso, em concreto do da “liberdade”, e aplicar a mesma vara de medir: que tam espanhol é o castelam coma o galego, e que é profundamente inmoral o castelam ter um status superior às outras linguas espanholas...ou nom temos todos os mesmos direitos?
2. Partidos na Galiza:
Constato que por um lado a maior parte dos votos obtidos pelo novo experimento do regionalismo (TEGA) têm-os tirado do BNG (veja-se Ferrolterra), e pelo outro no caso o espanholismo radical de UPD vêm do eleitorado mais espanholista do PSOE, com o qual acho que a médio praço tanto PP coma PSOE vam tirar a máscara de galeguismo que tiverom tradicionalmente para tender a posiçons cada vez mais espanholistas –cobertas claro está com o calote da “libertad para elegir”-, pelo o BNG podería ficar como único garante do galego, o qual poderia ser mesmo bom, se se enfocar desde a perspetiva que exponho no ponto 3.
3. A imposiçom do galego:
Non sendo sociólogo, percebo que a respeito da lingua a sociedade galega pode-se dividir em tres partes: umha minoria concienciada, outra minoria galegófoba e refractária a tudo o que seja a normalizaçom do galego, e umha maioria que o que procura é utilidade às cousas, que em muitos casos pasou do galego ao castelam porque ve esta língua como lingua internacional e útil, e o galego como algo própio , mas sobre tudo asociado ao passado e ao rural.
Quando a gente ouve das galescolas e do decreto do galego, percebe em boa medida que as opçons estam entre os nenos aprender castelám (ergo língua internacional e com futuro) ou galleguiño (lingua para falar com as vacas ou dos nazionalistas), quando a realidade é que com o sistema atual os nenos som competentes em castelam e quase analfabetos em galego, e com uma imersom lingüistica seriam competentes em castelam e mais em galego, que ademais é uma lingua internacional falada por 220 milhons de pessoas.
A gente têm que reparar que a disjuntiva nom é “umha grande lingua ou umha lingua para falar com as vacas” senom que é “umha grande língua ou duas grandes línguas”, e em um mundo tam mercantilista, mesmo os mais cépticos prefirem o 2x1.
Com certeza, isto é arriscado e requirre muito valor, mas acabamos de ver os resultados que so obtêm quando se joga às meias palavras: os seitor dos convencidos fica decepcionado e com frequéncia na casa, o dos galegófobos nom cambia, e a maioria –que é a que temos que ganhar- vota “por la libertad”, pois nom gosta das ambigüidade, a ambigüidade nom convence a ninguêm.
...Eu acho que a retórica de "abrir-se à sociedade", à Galiza nacionalista, é completamente baleira, simples ar. Poderíamos dizer assim que, com efeito, Quintana procurou "abrir-se à sociedade" fazendo esses apelos abrangentes que aqui, não sem razão, são criticados. O que é então abrir-se à sociedade? Ir e mil vezes ir a assembleias de distintos tipos e colectivos a convencer a uma gente que ao final não che vai votar e ainda correndo o risco de que digam que "queres instrumentalizalos"? Convencer aos da FPG? Não hom, que esses tão muito bem nas suas tertulias com chupito. Aos de "Galicia no se vende" que foram co-responsáveis de que agora "Galicia se regala" ao opus dei e a esperanza aguirre...? Não, para que nos metam a faca pelas costas não, que se abram eles a nós. Ou que se apresentem às eleições, se querem.
"Abrir-se à sociedade galega" Claro, assim depois entra em Vieiros de chachi o filho de Cuiña para ato seguido declarar a sua admiração pelo chefe do seu partido.
si, e que neste pais sobran chachis que van de guays, sobran ideologos infalibles de taberna e sobran merendiñas en busca de choio na política. Precisamos xente que traballe, sexa coherente na liña do tempo co que dí, e por riba de todo de exemplo..
Adiante Camilo!
Por favor, sede breves, é de mala educación escribir un comentario máis longo que o artigo do Sr. Nogeira.
Parabéns Camilo. Sigues nas mesmas e, mal que pese nestes tempos aciagos, efectivamente, tamén "daquela" tiñas razón.
En fin, iso xa é o de menos. Agora creo que todo o nacionalismo galego (veremos si desta volta sin sobervias, sin exclusións e sin condescendencia barata) poñémonos a pensar o que facer e como facelo.
Parece que comezamos unha etapa de moito interese, si somos quen de ser xenerosos e todos exercitamos a capacidade de diálogo e a procura de intereses comúns en maiúscula.
Con que organización/óns e con que persoas, que quede para última hora para quen máis aporte e máis convenza ao final do proceso, que podo intuir longo, complexo e cheo de minas unipersoais e pluripersoais.
Oxalá saibamos estar á altura das circunstancias, que ninguén se arrogue a posesión da verdade, que se poida arrepañar a todos e todas os/as que quedaron polo camiño e sexamos capaces de CONSTRUIR GALIZA, porque non está destruida, ESTÁ EN OBRAS.
Suso:
tu cres que realmente chegou a haver 390.000 neo-falantes ou falantes de galego? Ou mesmo aínda, quando o BNG chegou à alcaldia de Vigo, há tantos galego-falantes em Vigo? Eu pouco galego ouço... E em Ponte Vedra? Já não digo n'O Ferrol onde também o BNG teve um alcaide.
Não se deve de confundir um subconjunto com o conjunto. Eu podo dizer:
- A maioria dos neo-falantes apoiam o BNG... parez que sim, mas não
- A maioria dos votantes do BNG são neo-falantes. Isto é uma falácia.
Eu sim podo dizer,
- A maioria da militáncia (especialmente nova) do BNG é neo-falante. Sim, ou quando menos uma boa parte.
Então o votante do BNG é (a grandes riscos, tudo dependerá de onde falemos, mas o "padrão" -cousa que se deve de ter muito clara na actual configuração do sistema político):
-uma minoria galego falante muito conscienciada, geralmente de "famílias" já politicamente comprometidas com o galeguismo
- uma parte cada vez mais importante de neo-falantes ou bilingues tradicionais
- uma parte muito importante (um 50% talvez?) de castelhano falantes habituais que, esporadicamente ou segundo que condições, falam galego.
É mais, eu observo em Vigo muitos rapazes (duns 18-22 anos) com camisolas de "Galiza" e demais que falam só castelhano, mesmo quando tu lhe falares galego!.
O nacionalismo (e isto é onde se deve de abrir) deve começar a pensar que temos uma geração totalmente criada no castelhano (áreas de Vigo e Corunha), que o vem quase coma uma língua estrangeira e que nunca ou quase nunca o empregam, porém podem ter uma clara consciencia de "identidade nacional galega". Esta mesma população pode, baixo dterminadas circunstância empregar o galego, mas será difícil que o faça de jeito habitual.
ERC (quando obteve o melhor resultado electoral) já rompera esse mito: um pode ser nacionalista sem falar galego; um pode ser mesmo independentista sem falar galego; um pode apoiar grandes políticas linguísticas em favor do galego sem falá-lo. Ou é que em Euskadi não há independentistas que nem se preocupam de apreender eusquera?
Algum dia deverá chegar esta reflexão. Isso não quer dizer renunciar a que o galego for a UNICA lingua de uso nos movimentos sociais nacionalistas, mas sim não sacralizar (ou não transmitir) que só o galego é válido para a galiza.
Isto é questão também de conjuntos.
- Uma parte pequena dos galego falantes são nacionalistas galegos
- Uma parte pequena (porém maior que a anterior) dos castelhano falantes são nacionalistas galegos
É mais, não o fiz, mas estou certo que há uma correlação muito clara entre falantes habituais de castelhano e percentagem de voto ao BNG, doutra volta não explico o alto apoio ao BNG em concelhos totalmente castelhanizados (especialmente na área de Vigo): Cangas, Moanha, Porrinho, Ponte Areas, Gondomar,Salzeda de Caselas, Tominho (recentemente "colonizado" por parelhas novas de Vigo castelhano falantes), porém o PP mantém o seu eleitorado naqueles que não houve esta "colonização": Tui, O Rosal, Paços, Fornelos, Salvaterra...
** A maioria dos neo-falantes apoiam o BNG... parez que sim, mas não
- A maioria dos votantes do BNG são neo-falantes. Isto é uma falácia.
Deveria dizer
A maioria dos neo-falantes apoiam o BNG... parez que sim,
mas não, a maioria dos votantes do BNG são neo-falantes. Isto é uma falácia.
Con efeito, a estructura interna do BNG é incompatibel coa necesaria muda e renovación que, cada certo tempo, precisa unha organización (de calquera tipo).
O entorno sempre é cambiante. En troques, o BNG resposta coas actitudes de sempre aos novos problemas. Ainda que o BNG tivera maioría absoluta no Parlamento (refírome ao BNG actual), non estaría garantido que o BNG camiñara na liña de ir dotando ao País de estructuras de Estado.
A UPG é un partido que ten MEDO ao mundo. Un medo, por outra banda, producto da falta de preparación e formación dos seus membros, que únicamente ten experiencia en purgas e parvadas dese tipo que consumen recursos e forzas que deberían ir encamiñados a outros obxetivos.
Non abonda con que haxa nacionalistas gobernando. O máis importante é qué tipo de nacionalistas gobernan. Alguén imaxina a Quintana ou a Paco Rodríguez nunha xuntanza de nacións atlánticas (por poñer un exemplo). Sabe Quintana ou Paco falar inglés?. Eu non quero presidentes do meu país como algo exótico. Eu quero que o Presidente de Galiza chegue a unha conferencia internacional e esté a altura do presidente de Alemania (lembremos a Pujol).
Coa desfeita destas eleicións, os piares da organización empezan a rachar. Hai que empezar a falar sobor de onde queremos estar como país dentro de trinta anos. Cando eso esté decidido, só hai que poñer un calendario e escoller aos mellores. A vida é así de sinxela (é de complexa).
O noso País é pequeno, por iso non debemos deixar que xente coma ti estea na casa, fóra da acción política.
Hoxe son días tristes, e pouco a pouco ímonos olvidando coma que trata de olvidar un desamor.
Pero eu sinto que preciso do alento e das ganas de loitar que dende pequeno me impulsaron xente coma ti, Camilo.
Saúde irmáns.
Non hai volta atrás, o BNG vai en plena caida, e leva ao nacionalismo galego ao abismo desgraciadamente. É momento, para unha refundación, para a creación dunha "Unión Nacional Galega".
Para min está agora claro que non foi unha boa decisión decidirse por Quintana antes que por Camilo. Claro que agora, unha vez visto, non ten mérito.
Coido que o BNG pasou de ser unha forza percibida como innovadora, moderna, ilusionante entre a mocidade, a un partido máis. Lembro que hai uns anos as enquisas dicían que os novos votantes apuntábanse maioritariamente ao BNG. Coido que agora non é así.
O BNG necesita cambios de gran entidade:
- O primeiro é o interno. Hai que superar dunha vez as herdanzas que veñen da época na que o comunismo era unha opción teóricamente válida. O Muro de Berlín xa hai moitos anos que caeu, e sinceiramente, son ridículos os postulados da UPG, e menos mal que non son moi coñecidos porque peor iría o tema.
- O segundo, unha operación de marketing profunda. Non creo que haxa que mudar o nome, pero si a simboloxía. A estrela vermella sobra, asusta, non vai cos tempos, e perdeu todo sentido. A imaxe é importantísima, e a do BNG vense arrastrando sen modificacións, sen modernización, durante moitos anos. Isto xa llo dixen eu a Paco Rodríguez hai moitos tempo, pero o inmovilismo é un problema grande en certas persoas que levan demasiado tempo no mesmo sitio.
- O terceiro, unha profesionalización. Profesionalización na xestión do partido, profesionalización na interpretación do que quere a sociedade, profesionalización na xestión das campañas electorais, profesionalización no gabinete de comunicación. É incomprensible e imperdoable que non se fixese nada para controlar os ataques da Voz de Galicia, máxime estando nunha situación de poder institucional.
- E finalmente, un partido que aspire a liderar a sociedade, ten que comprendela. O liderazgo é entender o que quere a xente e darllo. Un partido de masas ten que entender que certas políticas, certas viraxes, poden ser entendidas como radicais por sectores moi importantes da sociedade. A aparición de organizacións como Galicia Bilingüe, con esas reflexións tan inxustas, era previsible e evitable cunha xestión intelixente do cambio, e é un fracaso do bipartito, e penso que principalmente do BNG.
Saúdos
Estive a ver, re-ver, aquele "Tengo una pregunta para Vd." de Carod-Rovira. Lá explica com claridade:
1.- Que deve falar-se de nacionalismo espaÑol, talvez o pior dos nacionalismos que há neste reino, entre outras razões porque conta com um exército bem armado, ou pelo menos muitíssimo mais armado do que podem estar os outros nacionalismos.
2.- Que ele, Carod, não é nacionalista, mas independentista.
3.- Que talvez noutra Espanha ele não o seria, mas nesta, exclusora de "los otros", não está bem e portanto o conducente é ir-se embora.
Non gañou o PP, perdeu o Bipartido
Os datos non enganan, mentres 120 mil galegos dában ás costas á Xunta PSOE-BNG, o PP só subiu 2000. Un sector da clase obreira galega deulles as costas e non confiaron neles para enfrentar a crise desde unha perspectiva de esquerda, posto que a abstencion foi masiva nas áreas urbanas e industrializadas de Vigo, A Coruña e Ferrol, onde superaram o 30%.
O balance dos catro anos da Xunta Bipartita redúcese a las “galescolas”, aos centros de dia e ao chamado transporte social. No debe atopamos todos os planos que o PP defendera, a Cidade dá Cultura, o AVE, o Porto Exterior, Reganosa, etc. etc. O proxecto de “progreso” foi diluíndose ao longo dos catro anos de legislatura.
Nin tan sequer foram capaces de sacar adiante o seu proxeto estrela, o Estatuto de Nacion. Renunciaba ao direito á autodeterminacion, e era a exixência dun sector da burguesia galega, que buscaba un marco de negociacion co Estado en mellores condicións, e non expresaba ningunha necesidade social.
O Bipartido renunciou a ser o porta-voz do pobo traballador galego, que o puxo na Xunta despois das loitas contra Aznar e Fraga. Pecharon a comision do Prestige sen que ninguén fose responsable, fixeron política para a burguesia “galega” cos plans Eolicos e acuicolas, mentres a patronal presentaba EREs (300 nos ultimos meses), iniciaba un proceso de despedimentos individuais e pedia mais subvencións que a Xunta daba sen rechistar.
Agora temos que nos preparar para a loita contra unha nova Xunta do PP. Os resultados demostran que hai unha base social na esquerda para afrontar a tarefa de construir un bloque da esquerda anticapitalista e autodeterminista, que parta da mobilizacion social para conquistar unha saída obreira e popular á crise.
Meendinho:
A ver, acho que não discordamos.
Eu penso que existe um tipo de gente que é galegofalante de sempre, ou neofalante, e que se caracteriza por ter uma consciência da língua, que a usa sempre, na casa, no trabalho, no lazer...que lha intenta transmitir aos filhos...Pois eu percebo que a imensa maioria dessa gente apoia e vota o BNG, seja ou não militante, e constituem a columna vertebral desse movimento. Aliás, tens razão em que alem dessa gente existe um sector, tu dizes que um número igual, de gente que é castelhanofalante e vota BNG. Mas é que eu não contava essa gente no meu cálculo, porque considero que essa gente são "votos prestados". Esse é um drama adicional do nacionalismo galego e do BNG, que mesmo tendo um 15% de apoio popular, isto é, uma porcentagem ridícula, na realidade isso é um éxito extraordinário. Tens razão, não há 350.000 pessoas que "vivam concientizadamente em galego". Ora, repara em que essa massa de "votantes prestados" ou espabila e acava por entrar definitivamente no galego ou finalmente se cansa e deixa de votar ao BNG (ou a ERC, repara na recente desfeita deste partido, que teve uma trajectória similar á do BNG, com uma suba de foguete e depois uma forte caída). Também acrescentarei que para mim a língua é a unica razão de ser do nacionalismo galego. Se desaparece a língua, não fica razão nenhuma...Castelão diz em "Sempre en Galiza", desde o seu exílio en Badajoz, que se el fosse extremenho seria socialista....Pois é, se desaparece a língua, os galegos convertem-se em asturianos, e daquela não tem sentido dizer que somos uma nação...uma nação não se pode construir desde supostas afinidades ou essências gastronómicas, de sentido de humor ou de música tradicional...
Mas alem destas questões, acho que concordamos no essencial, junto com outra gente no debate:
Necesitamos transcender a UPG e ter um partido nacional galego, progressista, moderno, comprometido fundamentalmente com a língua.
Obrigado Camilo Nogueira, pelas tuas reflexões(muito mais claras que a tua letra, :)-desculpa a brincadeira-.)Mas bem é certo que desde o 2001, ainda com Beiras, o BNG não soube fazer autocritica nenhuma.
Sempre ha que dizer, que naquela mitica frase de Beiras numa noite eleitoral, igual de triste da que foi esta, onde tentava botar balões fora com aquela frase na que não lhe faltava razão.
"Nós fizeramos os deveres foram outros os que não fizeram."
-Beiras nas eleições do 2001-
Acho que em 2009, 8 anos máis tarde do começo da descida progressiva dos votos ao BNG, os que votaram nestes ou noutros tempos ao Bloque, merecen e precisam de uma explicação e reconhecimento de erros do partido nacionalista
e qué tal Martiño Noriega? Home serio, con formación, bagaxe e traballador.
Eu tamén teño as miñas propias opinións e reflexións sobre o que se pasou no 1-M, mais penso que non aportarían nada novo a todo o que xa se ten escrito en vieiros.
Ora, gustaría non se esquecesen os comentarios como o de xavo, como o #36, co que concordo plenamente. Xa o dixen mais dunha vez: o muro de Berlín xa caeu, a estrela vermella ten que ser tirada da nosa bandeira xa, temos que deixar de pendurar calquera fotografía do Ché ou de ir para Cuba ver calquera tipo de "comandantes" e mudar a nosa imaxe radicalmente.
Mudemos a estreleira polo cáliz e as cruzes, que nos levan representando na Europa e no mundo desde hai 800 anos, mudemos as fotos do Ché polas de Castelao e Alexandre Bóveda e comezemos a deixarnos ver máis entre bretóns, galeses ou irlandeses porque o Atlántico é o noso espazo natural. Afortalemos os nosos lazos co norte portugués cooperando económica e culturalmente, aproveitemos a eurorrexión e axudemos aos galegos do sur a acadar unha certa autonomía. De verdade alguén pensa que todo iso vai xerar algún rexeitamento nos galegos e na Galiza? Eu non o vexo.
De verdade alguén pensa que toda a burguesía e o empresariado de Galiza continúa a ser da meseta? Como dixo o outro, habelas hainas, o problema é que esa xente nunca traballará cun proxecto nacional que promova un modelo económico semellante ao cubano ou ao venezolano.
Eu digo sí á refundación: Galiza precisa un partido socialdemócrata nacionalista.
Exemplos:
http://www.plaidcymru.org/
http://www.snp.org/
Ahí o tedes, xa está o BNG na vosa bandexa para que como alimañas destrocedes o pouco que queda da mellor opción política nacionalista da historia de Galiza. O voso autofagocitismo é de asco. Despois moitos de vos falades de sectarismo. Non vos preocupedes, ahí vos quedan as migallas do BNG. Eu pola miña parte teño claro que sempre vou traballar por Galiza, sexa dende o BNG (se deixades algo del) ou noutro proxecto. A ver o que sodes capàces de facer vos sós.
Concordo contigo scaaveiro, en parte.
Non abonda con impoñer o decreto do galego. É preciso que os que impoñen o decreto tamén sexan persoas que albiscan o futuro económico do país. Hai que vender o paquete completo.
Mais razón cun santo, mais non sei se tera forzas dabondo para liderar ise cambio ca idade que ten. O meu apoio total a Camilo Nogueira se decide loitar por ser o Voceiro Nacional. Xa estamos fartos dos upegallos, e a súa nula autocrítica.
meus deus... e isto será o reflexo dunha asamblea do bng?
Mira.. prefiro unha asemblea coa participación de tódol-os militantes que así o desexen que unha outra por delegados elexidos en Asembleas locais nas que non hai nin comisións de discusión, nin votacións secretas nin preparación do temario legal. Eso pasou na Coruña. Son eses os meus delegados? NON.
Beiras pode ser unha garantía para a transición até a Asemblea Ordinaria Urxente a realizar denantes que asuma o Feijóo.
Mellor discutir abondo que calar ou dicer que destruímos o BNG. Esas son mentiras dialécticas de perdedores ou pisadores de moqueta.
Concordo con alguén que ten que haber nacionalismo de esquerdas e de dereitas (ou centro, como lle queirades chamar). Os mellores sistemas serían o de centro e o social-demócrata no caso da esquerda. Teorías superadas coma o leninismo ou marxismo son contrallas ao nacionalismo galego (como dicía o meu grande amigo Vicente Risco).
E finalmente estou dacordo con Nogueira en moitas cousas.
Os partidos nacionalistas ante todo teñen que pensar en Galiza e non nos seus ideais: pensar na vida e traballo das familias do país, pensar na educación, na saúde e no territorio. Coñecer cada recuncho do país e falar coa xente, andar polas leiras e o monte e encherse de lama. E a partires daí facer o estudo sociolóxico que queiran. O que non pode ser é erguer a bandeira estrelecida dende a poltrona, e decir nun telediario unha parvada con verbas mesturadas entre Marx, Reboiras e a ecoloxía.
Falando coa xente, da rúa, do traballo, a que non frecuenta estas páxinas creo que as claves do triunfo de Feijóo está principalmente nestes puntos:
1º O desacordo dun sector bastante importante da poboación a que lles dean as clases aos seus fillos en galego. O pobo non é galego falante e non quere selo
2º A xente con voto socialista deixou de votarlle por pactar o PSOE co BNG e aos votantes soialistas non lle simpatizan os partidos nacionalistas. Algúns destes votantes mudaron o seu voto a *UPyD ou a EU ou partidos ecoloxistas.
3º Moitos nacionalistas deixaron de votar ao BNG por consideralo demasiado conservador e pouco nacionalista e non estar de acordo con algunha das súas cesións ao PSOE.
Todo isto beneficiou directa ou indirectamente ao PP. Doutra banda Fraga cansaba, pero Feijóo é alguén novo e por agora descoñecido. Se a iso se lle sumamos que Zapatero nos mentiu co da crise, Touriño dedicouse só a saír nas fotos e Quintana vendeu o seu apoio a unha ministra inepta como Magdalena Alvarez a cambio de non sabemos que, pois en Galiza non se notou ningunha vantaxe por esta venda.
Non creo que fosen determinantes as campañas de desprestixio, porque en ambas as partes desprestixiábanse eles sos. Ainda neste tema Feijóo tiña ventaxe ao destituír a un candidato por corrupción ao mais puro estilo Obama, mentras Zapatero non destituíu a Bermejo.
Despois da entradilla, xa non lle leo máis. ¿Cómo que curtas? ¿É vostede do PSOE? Nos non tiñamos un O Presidente, ainda que algún de Babia ou preto o crera. Dimisión de Alberto Ansede. Dous contra un, merda para cada un, que diciamos de nenos.
O señor Nogueira (que merece os meus respeitos e simpatías, por comparación coa maioría de líderes actuais do BNG) comeza falando de abrirse á sociedade e prosegue e remata coa cuestión da lusofonía, a pedra filosofal, polo visto, de moita xente nacionalista, uns por inxenuidade, e outros por pura obsesión cultivada durante anos.
O problema do galego é integrarse no sistema (e no léxico, modismos, etc..) portugueses?. Ou será que a sociedade aprecie o seu idioma, o fale, o transmita aos fillos? Vai solucionar eso unha hipotética (e utópica) asimilación ao Portugués?. Eso é unha maneira de tirar cara adiante sen querer ver a crúa realidade lingüística, confiando nunha especie de fórmula máxica tan absurda como balsámica para moitos (unha especie de evasión dos problemas: o paraíso e a terra prometida están en...renunciar ao Galego como idioma propio e integrarnos no "Grande Irmao" luso). En fin...
Por outra partem, por qué o señor Nogueira escrebe algúns artigos nu pseudoportugués e outros en Galego normativo?
Eu creo que o uso que do Portugués fixo cando estaba no parlamento europeo deixouno uin pouco "flipado".
Outro día, espero que aprofonde na cuestión do cambio no Bloque, que espero consista en algo máis que en adoptar a norma portuguesa.
Novo comentario
Se xa tes o teu nome en Vieiros, podes acceder dende aquí:
Camilo Nogueira
Camilo Nogueira Román naceu en Lavadores (Vigo) en 1936. Enxeñeiro industrial e economista, foi eurodeputado polo BNG entre os anos 1999 e 2004.
Máis opinións
- Foi alí, no Obradoiro (29/01/2010)
- Desamparo (16/01/2010)
- Da presidência da União (13/01/2010)
- Depois de Copenhague (30/12/2009)
- Brasil e nós (18/12/2009)
- Aminatou Haidar (09/12/2009)
- A dignidade dun povo (27/11/2009)
- Depois de cinco anos de crise (24/11/2009)
- Desorientación (10/11/2009)
- O momento da União Europeia: A eleicão do presidente (I) (27/10/2009)
- A cidade do Bósforo (13/10/2009)
- Os Jogos de Lula (08/10/2009)
- Um espectro ronda sobre Europa (30/09/2009)
- Zascandileando por Europa (21/09/2009)
- O sitio onde aninham todas as virtudes (16/09/2009)
- Crise e sociedade (08/09/2009)
- Expropiadores da nación (01/09/2009)
- Desde o valor de todo o feito... (27/08/2009)
- Estar na cereixeira (18/08/2009)
- Desleigados (12/08/2009)
- A propósito de Ence e Pescanova (e da agresión madrileña a Caixa Galicia) (03/08/2009)
- Tanta gente, tão preparada (28/07/2009)
- Desconcerto (21/07/2009)
- De costas viradas (14/07/2009)
- A propósito do financiamento autonómico (07/07/2009)
- Castelao entre nós (30/06/2009)
- Mirar para alén (23/06/2009)
- O conto é que... (16/06/2009)
- Non será doado (09/06/2009)
- Os europeos e a consciencia da Unión (02/06/2009)
- Xogando coas cousas de comer (26/05/2009)
- O acosso que não diz o seu nome (19/05/2009)
- Depois da Asemblea (12/05/2009)
- Da língua (05/05/2009)
- Aventura inacabada (28/04/2009)
- Unha penosa contradición (21/04/2009)
- Abrir-se à sociedade (14/04/2009)
- O patrón de Europa (07/04/2009)
- O peso em Madrid (31/03/2009)
- Contra a desertización (24/03/2009)
- Lula e Obama (17/03/2009)
- O acordo necesario (10/03/2009)
- Desde o areal de Estorde (24/02/2009)
- EEUU, China, a UE e nós (17/02/2009)
- Belém da Amazônia (10/02/2009)
- Sobre Galiza na crise (03/02/2009)
- Como Lincoln e Mandela (27/01/2009)
- O presidente eleito (17/01/2009)
- Bombardear un campo de concentración (30/12/2008)
- Un territorio común (03/12/2008)
- O soño americano (30/10/2008)
- As medallas olímpicas (17/08/2008)
- As primarias demócratas en EEUU (13/06/2008)
- Unha nación no mundo (02/04/2008)
- Crónica de Palestina (18/02/2008)
- A experiencia e o cambio (10/01/2008)
- Non teñen remedio (29/05/2007)
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto