Vieiros

Este mudanza na situación política de Galicia, a nivel municipal, é unha continuidade que traslada a ese nivel o cambio que se iniciou nas pasadas eleccións autonómicas, coa formación dun novo goberno na Xunta de Galicia constituído por unha coalición do PSOE e o BNG que substitúe ao longo período de maiorías absolutas do Partido Popular, que permitira gobernar a Fraga desde decembro de 1989.

O acordo marco alcanzado polo PSOE e BNG recentemente, deu o seu froito - razoablemente - a nivel local o pasado día 16 de xuño (certo que con excepcións). Nin o PSdG nin o BNG, por si mesmos, obtiveron resultados que permitisen, de xeito xeneralizado, gobernos monocolor. A perspectiva a medio prazo de que algún dos dous partidos poida acadar unha hexemonía que lle permita gobernar en solitario é moi improbable, o que veu forzando e forzará aínda, un entendemento entre ambas forzas políticas, co risco de que se este non se produce, o Partido Popular, que mantén, aínda, unhas bases sociais suficientemente amplas e consolidadas, que o converten nunha ameaza e nun rival forte con capacidade, aproveite calquera ocasión para facer reversible a situación política nas próximas eleccións.

O PP foi capaz, en circunstancias adversas, de obter uns bos resultados, aínda que iso non evite unha enorme perda de cota de poder. Consegue a maioría en dúas provincias, as do Sur, que lle permiten manter os gobernos de ambas deputacións e, sobre todo, obtivo un bo resultado nas principais cidades, nalgunhas moi próximos á maioría absoluta; pola contra, nun escenario dunha participación bastante baixa nas cidades, tanto o PSdG (case logra manter os votos recibidos en 2003 -Ourense e Ferrol case compensan as perdas na Coruña e Santiago) como o BNG (de forma moi significativa - en todas e cada unha das sete cidades perde votos)) diminuíron os seus apoios. Ambos partidos deberan analizar detidamente as causas que motivaron ese escenario, ben sabido, por distintos estudos realizados sobre o comportamento electoral dos últimos quince anos, que a baixa participación prexudica especialmente á esquerda.

Liberados do vazquismo
Aínda que alcanzaron unha cota de poder inmensa, por primeira vez, na nosa terra, o BNG ha de demostrar que non acadou, aínda, o seu teito electoral e para ampliar as súas bases conta con instrumentos que nunca tivo. Pero é un arma de dobre fío: se non demostran con iso unha boa capacidade de xestión e unha resposta eficaz para solucionar as demandas cidadás, pode virarse en contra. O Partido Socialista de Galicia, liberado do vazquismo -que actuou como aliado permanente do fraguismo - , ha de demostrar a súa visión galeguista, o seu compromiso con Galicia na súa política, abrirse, ademais, aos sectores e grupos emerxentes da sociedade. Ambos han de ser capaces de transmitir unha verdadeira política alternativa con respostas aos problemas actuais, tanto a nivel municipal e autonómico e cunha visión de futuro de país, con claridade.

As friccións e conflitos de interese que se produzan entre as dúas forzas políticas, aínda que estas prodúcense só nalgúns gobernos locais importantes, terá un efecto de maior envergadura, porá en dúbida a fórmula de gobernos de coalición e sobre ese hipotético fracaso o PP traballará as súas maiorías absolutas.