Vieiros

Vieiros de meu Perfil


A PONTE

O PP e a súa rebaixa de impostos

09:57 14/02/2009

Coma se non pasase nada nos últimos tempos o neoliberalismo segue engominado coma se a crise económica e social non tivese nada que ver coas súas formulacións. O apoio dalgúns senadores republicanos obrigou a Obama a sacrificar algunhas partidas destinadas á construción de escolas (16.000 millóns de dólares menos) e recortar drasticamente os subsidios de saúde para desempregados. Recortes todos eles que foron engrosar o 35% dos 611.580 millóns de euros, destinados a unha rebaixa fiscal.

As rebaixas fiscais e redución de impostos segue sendo un dos principais obxectivos das políticas neoliberais. E así se fai constar no programa que presenta o PP ás eleccións galegas do 1 de marzo, no seu apartado económico, como medida anticrise, de revitalización económica para favorecer o mantemento e creación de empresas.

Populista e neoliberal
Maila a súa importancia, apenas ocupa algunhas liñas dentro dun amplo programa no que usa unha extensa terminoloxía moderna, ecoloxista e social. Crecemento sostible, protección do medioambiente, etc, pero nin unha soa palabra sobre o "Plan Acuícola" aprobado polo bipartito, no seu lugar, unha promesa de creación de novas instalacións de acuicultura ou de impulso á modificación da lei de costas, ¡que xustifica para protexer os núcleos tradicionais!. (E mentres a Comisión Europea aproba un durísimo informe contra os desmans urbanísticos cometidos en España)

No plano social promete o recoñecemento de novos dereitos subxectivos e aumentar o gasto social destinado ao apoio ás familias. Promesas, moitas das cales, esconden enormes contradicións e que son, a miúdo, unha concesión ao populismo, cun programa económico que nas súas liñas mestras é de corte neoliberal. Así, propón no punto 1.5. titulado "Políticas de redución das cargas fiscais persoais e empresariais" entre outras medidas "utilizar os instrumentos tributarios de autogoberno para favorecer a creación de empresas, actuando sobre os seguintes tributos: Imposto de Sucesión e Doazóns; no tramo autonómico do IRPF; Imposto de Trasmisiones Patrimoniais e Actos Xurídicos Documentados ".

Redistribuír, ¿a favor de quen?
A maiores - din no texto- instaron, a través do Grupo Parlamentario do PP en Madrid, substituír as cotizacións á seguridade social por un ¡ IVE social!, o que suporía maiores impostos indirectos claramente regresivos (non teñen en conta o nivel de ingresos de cada cidadán) e que foi rexeitado polos deputados socialistas e nacionalistas galegos.

¿Esas reducións terán consecuencias nos investimentos en educación, en sanidade, nos programas de apoio ás familias, etc?. ¿É a Comunidade de Madrid o modelo a seguir do PP galego?.

No fondo seguimos coa idea de que as mesmas políticas que xeraron a crise, nas súas distintas variantes, poden servir para solucionala. Non obstante, como dicía A. Einstein, non podemos resolver problemas pensando do mesmo xeito que cando os creamos.

4.47/5 (15 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Eduardo Rego

Eduardo Rego

Eduardo Rego Rodríguez (Santiago de Compostela, 1955). É profesor titular de Socioloxía na Universidade da Coruña, onde imparte a materia de Socioloxía Política.



Máis opinións